Mgonjwa wa 50 apandikizwa figo salama Benjamin Mkapa

 

Hospitali ya Benjamin Mkapa (BMH) imefanikiwa kumpandikiza figo (kwa mafanikio) Mgonjwa wa Hamsini (50) tangu kuanzishwa kwa huduma ya upandikizaji figo Hospitalini hapo tarehe 22 Machi, 2018.

Mkurugenzi Mtendaji wa BMH Prof. Abel Makubi amesema kuwa Mgonjwa huyo Emmanuel Woiso (38) ambaye leo ameruhusiwa kurudi nyumbani kuendelea na shughuli zake ni mafanikio makubwa katika huduma za kibingwa bobezi ambazo zinatolewa na Wataalamu Wazawa na amempongeza Mhe Rais Samia Suluhu Hassan kwa kuendeleza uwekezaji Mkubwa anaoufanya katika Sekta ya Afya inayowezesha huduma kama hizi kupatikana hapa nchini ambapo hapo awali zilikuwa zikipatikana nje ya nchi tu.

“Takribani miaka 6 iliyopita Hospitali ya Benjamin Mkapa ilikuwa kituo cha pili hapa nchini kuanza kutoa huduma hiyo ambapo kati ya Wagonjwa hao 50 waliopandikizwa hapa BMH, asilimia 95% wanaishi na kuendelea na majukumu yao,” alisisitiza Prof. Makubi.

Ameongeza kuwa takribani asilimia 98% ya Wagonjwa wanaopandikizwa figo wanaendelea kuishi na kufanya majukumu yao baada ya kipindi cha mwaka mmoja tangu kupata huduma hiyo huku wastani wa asilimia 86% wakiendelea kuwa hai baada ya miaka mitano tangu kupata huduma jambo linaloonesha ubora wa huduma hii hapa nchini kuwa ni mzuri kwa viwango vinavyofanana na maeneo mengine Duniani kama Marekani, Ulaya na India.

Akizungumzia gharama za matibabu hayo Prof. Makubi amesema kuwa kwa sasa Serikali inaingia gharama ya wastani wa Shilingi 34 Milioni kumtibu Mgonjwa wa figo hapa nchini ukilinganisha na Wastani wa Shilingi 64 Milioni kumtibu Mgonjwa nje ya nchi kama India na Ulaya, hivyo kwa Wananchi hao 50 waliotibiwa figo hapa BMH Serikali imetumia takribani Shilingi 1.7 Bilioni ikilinganishwa na takribani Shilingi 3.3 Bilioni endapo wananchi hao wangetibiwa nje ya nchi hivyo kuokoa takribani shilingi 1.6 Bilioni.

Prof. Makubi amesema mwelekeo wa BMH katika mwaka 2025 ni kuongeza zaidi kasi ya huduma za upandikizaji figo kwa kutumia teknolojia za kisasa zaidi za upasuaji uvunaji figo wa matundu madogo (Laparoscopic Nephrectomy) badala ya kupasua sehemu kubwa ya mwili katika kuvuna figo na pia kuwekeza katika upasuaji wa kutumia Robot (Robotic Surgery) ambazo hurahisisha kazi kwa watalaamu.

“Tuna kituo chetu cha matibabu ya figo tunakwenda kukipanua kiwe kituo cha umahiri cha upandikizaji wa figo hapa nchini na Afrika Mashariki na Kati kwa ufadhili wa Serikali ya Japan kwa gharama ya takribani Shilingi 33 Bilioni ambapo tunashirikiana na Chuo Kikuu cha Dodoma ambapo tutabobea katika Robotic Surgeries,” alimalizia Prof. Makubi.

Naye Bw. Emmanuel Woiso ambaye amepata huduma ya matibabu ya kupandikizwa figo hapo BMH, amesema kuwa ametembea kwenye Hospitali kadhaa kubwa hapa nchini na kushauriwa afike BMH ndipo ataweza kupata matibabu hayo ya kupandikizwa figo.

“Baada ya kufika BMH nikaanza kuchukuliwa vipimo na baada ya Vipimo kwenda vizuri nikapangiwa uperesheni ya kupandikizwa figo na baada ya matibabu hayo kukamilika hali yangu sasa najiskia vizuri, naishukuru Serikali kwa kuboresha huduma hizi za Afya na kutuwezesha sisi Wananchi kuzipata hapahapa nchini,” alishukuru Bw. Emmanuel Woiso.