Joe Biden abainika kuwa na Saratani kali ya tezi dume

 

Rais wa zamani wa Marekani, Joe Biden, mwenye umri wa miaka 82, amegundulika kuwa na Saratani ya tezi dume ambayo imeenea hadi kwenye mifupa, kwa mujibu wa taarifa kutoka ofisi yake iliyotolewa Jumapili.

Biden, ambaye aliondoka madarakani mwezi Januari 2025, aligundulika na ugonjwa huo siku ya Ijumaa baada ya kwenda kumuona daktari wiki iliyopita kutokana na dalili za kwenye mkojo.

Saratani hiyo ni aina kali zaidi ya ugonjwa huo, ikielezewa kuwa na alama ya Gleason ya 9 kati ya 10. Hii ina maana kuwa ugonjwa wake umeainishwa kama wa "daraja la juu," na seli za saratani zinaweza kusambaa kwa haraka, kulingana na shirika la Cancer Research UK.

Biden na familia yake wameripotiwa kuwa wanapitia chaguzi mbalimbali za matibabu. Ofisi yake iliongeza kuwa saratani hiyo ina uhusiano na homoni, jambo linalomaanisha kuwa ina uwezekano mkubwa wa kudhibitiwa.