Amuua mkewe kwa shoka kisa kumyima unyumba

 

Jeshi la Polisi Mkoani Ruvuma linamsaka Martin Hyera kwa kosa la kumuua mke wake Luciana Kapinga kwa kumpiga na kitu chenye ncha kali kichwani chanzo kikiwa kunyimwa unyumba.

Kamanda wa Polisi mkoa wa Ruvuma SACP Marco Chilya amesema kuwa, tukio hilo limetokea tarehe Novemba 14, 2024 majira ya saa 12 asubuhi katika kitongoji cha mbilo kijiji cha kizuka kilichopo kata ya kizuka tarafa ya Mhukuru Wilayani Songea.

Ameeleza kuwa mwanamke aliyejulikana kwa jina la Luciana Dastani kapinga (22) mkulima mkazi wa kitongoji cha mbilo aliuawa kwa kupigwa na kitu kizito chenye ncha kali maeneo ya kichwani upande wa juu wa jicho la kushoto hadi kichwa kubonyea na mume wake aitwaye Martin Hyera baada ya kumnyima unyumba.

"Wawili hao walionekana alfajiri wakikimbizana huku mtuhumiwa Martin Hyera akiwa ameshika mpini wa shoka kisha kutekeleza mauaji hayo na baada ya mauaji hayo mtuhumiwa alimpigia simu shangazi yake aitwaye Paulina Nchimbi na kumjulisha kuwa amemuua mke wake kwa sababu amekuwa akimnyima unyumba kwa muda mrefu kisha mtuhumiwa akatoroka," amesema Kamanda Chilya.