RC Njombe atoa wito wa ushiriki mkubwa uchaguzi Serikali za Mitaa

 

Mkuu wa Mkoa wa Njombe, Mhe. Anthony Mtaka, ametoa wito kwa wananchi kujitokeza kwa wingi kushiriki katika uchaguzi wa serikali za mitaa mwaka huu. Akizungumza jana katika mkutano wa hadhara uliofanyika Halmashauri ya Mji Makambako, Mhe. Mtaka alisisitiza umuhimu wa kila mwananchi kutekeleza haki yake ya kidemokrasia kwa kuchagua viongozi watakaosimamia maslahi ya wananchi na kuleta maendeleo katika jamii.

"Huu ni wakati wa kuonyesha uzalendo kwa kushiriki kikamilifu katika uchaguzi," alisema Mhe. Mtaka. Alibainisha kuwa, ushiriki wa wananchi wengi katika uchaguzi huo ni msingi muhimu wa kuimarisha utawala bora na uwajibikaji katika ngazi za mitaa.

Mhe. Mtaka pia aliwataka wananchi kuhakikisha wanawachagua viongozi wenye maono ya kuleta maendeleo endelevu, ambao watahakikisha huduma za kijamii zinaboreshwa na changamoto zinazowakabili wananchi zinapatiwa ufumbuzi wa kudumu.