Watanzania wakumbushwa gharama kubwa za mizozo ya kisiasa

 

Katika safari ya Tanzania kuelekea Dira ya Uchumi wa Viwanda ya 2050, kumekuwa na msisitizo mkubwa wa uwajibikaji wa kila raia. Si tu katika kulinda mazingira na rasilimali za asili, bali pia katika kudumisha amani na utulivu wa kitaifa, hasa kufuatia nyakati nyeti kama vile uchaguzi au baada ya uchaguzi.

Wito unatolewa kwa Watanzania kukumbuka kwamba mizozo, vurugu, na uasi baada ya uchaguzi huleta gharama kubwa na za kudumu zinazoharibu rasilimali na miundombinu ya ujenzi wa taifa.

Wakati Serikali inaendelea kuwekeza katika huduma za msingi na miundombinu, vitendo vya uchochezi na vurugu huhatarisha moja kwa moja mafanikio hayo. Wananchi wanakumbushwa kwamba machungu ya matukio yaliyopita ya Oktoba 29 hayafai kujirudia, kwani yanadhoofisha utulivu na kuongeza machungu na majuto kwa taifa.

Mkazi wa Dodoma, Jackson John, anasisitiza ukweli huu:“Mizozo mara nyingi husababisha watu kuhamahama, kuharibu mazingira na kutumia rasilimali bila mpangilio, lakini kwenye jamii yenye amani kuna weledi na utaratibu katika usimamizi wa rasilimali jambo ambalo huchochea maendeleo endelevu na kizazi cha sasa na kijacho kunufaika,” anasema.

Kauli hii inafafanua gharama halisi za mizozo kwani ghasia za kisiasa au maandamano yanayogeuka kuwa vurugu huweza kuharibu mali za umma na binafsi, miundombinu ya barabara, vituo vya huduma, au huduma za maji, hivyo kurudisha nyuma maendeleo kwa miaka mingi na kuhitaji fedha za taifa zitumike kwa ukarabati badala ya kufanya maendeleo mapya.

Katika mazingira ya hofu taasisi nyingi hushindwa kutekeleza majukumu yake na hivyo kusababisha mizozo katika matumizi ya rasilimali za asili (kama misitu na maji) kwa kufanyika bila mpangilio.Mizozo husababisha watu kuacha makazi yao na shughuli za uzalishaji mali, kuongeza mzigo kwenye maeneo wanayokimbilia, na kuharibu uchumi wa kaya.

Ili kufikia malengo ya kitaifa, Watanzania wanakumbushwa umuhimu wa mazungumzo ya kujenga badala ya kufuata sauti za uchochezi na vurugu.

Kwenye jamii yenye amani na utulivu, kuna weledi (professionalism) na utaratibu (order) katika jinsi rasilimali zinavyosimamiwa. Hii inaruhusu mipango mikakati ya muda mrefu kutekelezwa bila kukatizwa.

Viongozi na wananchi wanatakiwa kujiepusha kabisa na sauti yoyote inayoweza kuchochea uasi, chuki, au migawanyiko. Amani ya nchi ni msingi mkuu wa uchumi, biashara, na uwekezaji.

 Utulivu wa kisiasa huunda mazingira mazuri kwa viongozi na watumishi wa umma kufanya kazi kwa ufanisi, kuandaa bajeti, kusimamia fedha, na kuhakikisha huduma za jamii zinafika kwa wakati na ubora unaotakiwa.

Kudumisha amani, kukataa vurugu, na kushiriki katika mazungumzo yenye kujenga ndio njia pekee ya kuhakikisha ujenzi wa taifa unaendelea. Utulivu wa taifa unalinda rasilimali zetu, unaepusha gharama zisizo za lazima, na unahakikisha kuwa kizazi cha sasa na kijacho kinanufaika na maendeleo endelevu.