Jeshi la Polisi nchini limeendeleza kampeni ya kutoa elimu na kuimarisha
ushirikiano na wananchi katika mikoa mbalimbali, likisisitiza umuhimu wa jamii
kuwa walinzi wa amani na kufichua mapema viashiria vyovyote vya uvunjifu wa
amani, ikiwemo kuwafichua wageni na watu wenye nia mbaya.
Viongozi wa Polisi kutoka Mikoa ya Njombe, Katavi, na Tanga wametoa wito
kwa makundi tofauti, kuanzia Maafisa Usafirishaji (Bodaboda), Wafanyabiashara,
Vijana, hadi Wafugaji, kuweka kipaumbele katika kulinda amani, kwani ndiyo
msingi wa maendeleo na mafanikio ya Taifa.
Bodaboda Waaswa Kufichua Wageni na Kuwajibika Mtandaoni
Kamanda wa Polisi Mkoa wa Njombe, Kamishna Msaidizi wa Polisi (ACP)
Mahamoud Hassan Banga, amewataka Maafisa Usafirishaji kutumia Mitandao ya
Kijamii kwa busara na si kwa uchochezi au uvunjifu wa amani.
Akiwasihi kuendelea kushirikiana na Jeshi la Polisi, Kamanda Banga ametoa
wito maalum kwa Bodaboda kuacha kuwasafirisha au kuwaficha watu wenye nia ovu
na nchi , hasa wale wanaotaka kuvuruga amani. Badala yake, wametakiwa
kushirikiana na Polisi kuwafichua watu wote hawa, ikiwemo wageni, ili hatua
stahiki zichukuliwe mapema.
Puuzeni Wachochezi wa Mitandaoni na Epukeni Kurubuniwa
Kwa upande wa Mkoa wa Katavi, Mkuu wa Polisi Jamii Mkoa, Mrakibu wa
Polisi (SP) John Mwaipungu, amewataka wananchi kuwapuuza na kuwakemea kwa nguvu
zote wale wote wanaohamasisha vitendo vya uvunjifu wa amani kupitia Mitandao ya
Kijamii.
SP Mwaipungu ameeleza kuwa vitendo vya uchochezi ni kosa kisheria na
vinatoka kwa watu wasio na mapenzi mema na nchi yao. Aidha, amewaonya vijana
kutokukubali kurubuniwa na kujiingiza katika uhalifu, akisisitiza kuwa hatua za
kisheria zitachukuliwa dhidi ya yeyote atakayebainika.
Toa Taarifa Mapema: Ushirikiano ni Nguzo Muhimu
Jeshi la Polisi Mkoa wa Tanga limeendeleza jukumu la kutoa elimu kwa
jamii. Mratibu wa Polisi Jamii Wilaya ya Lushoto, SP Emanuel Shilla,
alipokutana na wafanyabiashara, alisisitiza umuhimu wa kutoa taarifa mapema za
viashiria vyovyote vya uchochezi au uvunjifu wa amani.
SP Shilla alieleza kuwa ushirikiano kati ya jamii na Jeshi la Polisi ndio
nguzo kuu ya kuimarisha usalama na kuzuia matukio kabla hayajatokea. Wananchi
wa Lushoto wameahidi kuendeleza ushirikiano huu kwa kutoa taarifa sahihi na za
wakati.
Wakati huohuo, katika Wilaya ya Handeni, Mkuu wa Upelelezi wa Makosa ya
Jinai Mkoa wa Tanga, ACP Wambura, alikutana na Wafugaji wa jamii ya Kimasai na
kuwasihi kuepuka migogoro na kuwa mabalozi wa amani kwa kutoa taarifa za
uchochezi au vurugu mara wanapozibaini.
Polisi inahimiza wananchi:
Amani ni Mtaji Wetu Mkuu. Kwa kila Mtanzania kuacha kurubuniwa, kupuuza
‘drama’ zinazonufaisha watu wachache, na kutoa taarifa za viashiria vya
uvunjifu wa amani, tutakuwa tumelinda maendeleo yetu binafsi na Taifa kwa
ujumla. Tumia namba za dharura za Jeshi la Polisi kutoa taarifa zako kwa usiri na usalama.
0 Maoni