Hayo yamesemwa na Msaidizi wa Mhifadhi Mkuu wa Shamba la
Miti Saohill Said Singano akizungumza katika zoezi la usahili wa vijana
watakaochaguliwa kujiunga na kikosi cha kupambana na kuzuia majanga ya moto
pindi yanapotokea katika maeneo ya misitu ikiwa ni msimu wa kiangazi, usahili
ulioanza kufanyika katika makao makuu ya shamba tarehe 18 Juni 2024.
Amesema kuwa kila mwaka shamba limekuwa na utaratibu wa
kuajiri wafanyakazi kwa mkataba wa miezi sita kuanzia Julai mpaka Disemba huku
lengo kuu ikiwa ni kuhakikisha misitu na maeneo yanayolizunguka shamba yanakuwa
salama dhidi ya majanga ya moto huku akisisitiza vijana wanaopata nafasi ni
wale wanaokidhi sifa zilizowekwa.
Aidha, amewataka vijana wanaopata nafasi kufanya kazi kwa
bidii na uadilifu na kufuata maelekezo wanayopewa na viongozi wao muda wote
wanaokuwa kazini na kusisitiza kwa wale waliokosa nafasi kuendelea kushirikiana
na shamba katika shuguli za ulinzi wa msitu kwani kuna kazi nyingi
zinazoendelea ndani ya shamba.
Sambamba na hilo ametoa wito kwa wananchi wanaolizunguka
shamba kuendelea kuhakikisha wanafuata
taratibu zilizowekwa za uanzishwaji wa moto ili kuepusha moto usiotarajiwa
ikiwepo kuandaa mashamba kwa wakati na kuacha kurina asali kwa kutumia moto na
kuwataka kutumia njia za kisasa wanazoelekezwa na shamba.
Kwa upande wake Mkuu wa kitengo cha ulinzi wa msitu katika
Shamba la Miti Saohill Mhifadhi Murya Sawa amesema kuwa zoezi la kukabiliana na
majanga ya moto katika misitu ni jukumu la kila mwanachi hivyo linahitaji
uzalendo na ukakamavu ili kukabiliana na hatari inayoweza kujitokeza na
kuwataka wananchi wote kuendelea kuchukua tahadhari dhidi ya moto hatarishi.
Naye Kaimu Kamanda wa Jeshi la Zimamoto na Uokoaji Wilaya ya
Mufindi Sajenti Ashery Kitundu amesema kuwa Jeshi la Zimamoto limekuwa
likishirikiana na Wakala wa Huduma za Misitu Tanzania kupitia Shamba la miti
Saohill ili kuhakikisha kuwa elimu dhidi ya majanga ya moto hususani wa
misituni inawafikia wananchi wengi Wilayani Mufindi ili kuhakikisha wanakuwa na
tahadhiri dhidi ya moto hatarishi wa msituni.
Zoezi la usaili linatarajiwa kuendelea katika vituo vyote vya tarafa zote za Shamba Tarafa ya Kwanza Irundi, Tarafa ya Tatu Ihalimba pamoja na Tarafa ya Nne Mgololo.
0 Maoni