Mkuu wa Mkoa wa Arusha Mhe. Paul Makonda, amewasimamisha
kazi Mganga Mkuu wa Wilaya ya Arumeru Mkoani Arusha Dkt. Petro Mboya pamoja na
watumishi wengine wa idara ya Afya Wilayani humo ili kupisha uchunguzi kutokana
na tuhuma za ubadhirifu wa zaidi ya Milioni 600 zilizokuwa zitumike kwenye
sekta ya afya.
RC Makonda ameetoa agizo hizo hilo wakati wa mkutano wake wa
hadhara eneo la Ngaramtoni Jijini Arusha baada ya kubaini kuwa Watumishi hao
bado wanaendelea na kazi wakati uchunguzi ukiendelea dhidi yao.
Katika hali ya kustaajabisha, RC Makonda ameshangazwa na
Jeshi la Polisi Wilayani Arumeru kwa kushindwa kumpata Mhasibu msaidizi wa
Halmashauri ya Arumeru anayedaiwa kutoroka na kutoonekana ofisini mara baada ya
kudaiwa kuiba Milioni 333 za serikali.
RC Makonda, amewaambia wananchi wa Arumeru kuwa Halmashauri
yao imeoza na inanuka rushwa katika idara mbalimbali na hivyo ametangaza
kuandika barua serikali kuu kuomba kuongezewa nguvu kwenye Taasisi ya kuzuia na Kupambana na Rushwa Mkoani Arusha
ili kupambana na vitendo vya rushwa alivyosema vimekithiri kwenye Mkoa wa
Arusha.
Aidha, RC Makonda ameapa kupambana na rushwa kwenye Mkoa wa Arusha na ametahadharisha kwa watumishi na viongozi wengine wenye kuendekeza vitendo vya rushwa akisema siku zao za moto zimekaribia.
0 Maoni