Wizara ya Maliasili na Utalii, kupitia Bodi ya Utalii Tanzania (TTB) katika kuhakikisha kuwa inatimiza malengo iliyojiwekea kama nchi ya kupata watalii milioni tano na kuliingizia taifa zaidi ya dola za kimarekani bilioni sita kwa mwaka, hivi sasa inashiriki maonesho makubwa ya utalii duniani ya World Travel Market (WTM) yanayoendelea nchini Uingereza ili kutangaza urithi na hazina kubwa ya vivutio vya utalii ambavyo vinapatikana Tanzania.
Akizungumza leo Novemba 7,
2023 jijini London kuhusu mafanikio ya ushiriki wa Tanzania katika maonesho ya
WTM ya mwaka huu, kiongozi anayeongoza ujumbe wa TTB katika maonesho hayo Bw. Damasi
Mfugale ambaye ndiye Mtendaji Mkuu wa TTB amesema tayari wameshafanya majadiliano na kushawishi
makampuni kadhaa makubwa duniani kuwaleta watalii nchini mapema hapo mwakani.
“Kama unavyofahamu China ni
miongoni mwa soko letu la kimkakati, tayari katika maonesho haya tumekutana nao
kupitia kwa mdau kubwa anayejulikana kama Marcus Lee tumekubaliana mambo kadhaa
na tayari maandalizi ya kuwaleta watalii China ikiwepo mafunzo yajulikakanayo
kama China ready program, programu inayotegemea kuanza mwezi Februari mwakani
2024,” amefafanua Mfugale.
Aidha, amesema mpango uliopo
ni kukamilisha kufanya ushawishi na majadiliano na makampuni yote makubwa ya
wapeleka watalii au ya usafirishaji watalii kutoka kwenye vitovu vya masoko ya
utalii duniani kwenye mabara yote yanayoshiriki maonesho haya.
Ameyataja baadhi ya
makampuni makubwa ya kimkakati wanayoendelea kufanya nao majadiliano kuwa ni
pamoja na KUONI, TUI, Expedia, China Truly Travel Hey & Jervis (UK) Africa Explorers
(Italy) na Thomson (UK).
WTM ni miongoni mwa maonesho
makubwa ya utalii duniani ambayo yametimiza miaka 43 toka kuanzishwa kwake, kwa
sasa huwakutanisha zaidi ya wadau 700 kutoka sehemu mbalimbali duniani kwa
maana ya wauzaji, wanunuzi na waandishi na wanahabari.
Na. John Mapepele
0 Maoni