Wananchi wa Wilaya ya Meatu Mkoani Simiyu
wanatarajiwa kuondokana na adha ya upatikanaji wa huduma za afya na elimu baada
ya Mamlaka ya Usimamizi wa Wanyamapori Tanzania (TAWA) Kwa kushirikiana na
Kampuni ya Kitalii ya Mwiba Holdings Ltd. kuibua miradi ya ujenzi wa zahanati
moja katika Kijiji cha Matale, madarasa
manne na ofisi mbili za walimu katika
Kijiji cha Mbughayabanyha.
Hatua hii ni sehemu ya jitihada za Serikali
kupitia TAWA na wadau wake katika kutatua changamoto za wananchi na kuhakikisha
jamii zinazozunguka maeneo ya hifadhi zinanufaika moja kwa moja na rasilimali
za wanyamapori.
Akizungumza katika hafla ya uwekaji jiwe la msingi katika miradi hiyo
Novemba 25, 2025 iliyofanyika katika vijiji hivyo, Mkuu wa Wilaya ya Meatu Mhe.
Fauzia Ngatumbura aliipongeza TAWA Kwa kushirikiana na Kampuni ya Mwiba
Holdings Ltd. Kwa Kuibua miradi yenye
tija na manufaa makubwa inayozingatia utu wa mtanzania na kutoa rai kwa
wananchi kuthamini, kulinda na kutunza miradi hiyo.
"Niwapongeze sana TAWA Kwa kushirikiana
na wadau wenu kwa usimamizi mzuri wa miradi hii na Kazi kubwa mliyoifanya,
ambapo Kwa kushirikiana na wananchi mmeweza kuibua miradi kila Kijiji Kwa
kuzingatia mahitaji ya maeneo husika" alisema Mhe. Fauzia.
"Wito wangu kwenu wananchi ni kwamba
muendelee kuuenzi uhifadhi, kutoa ushirikiano Kwa wahifadhi katika kulinda
hifadhi zetu, kwasababu kupitia hifadhi hizi tunaweza kupata fedha za kigeni na
fedha Kwa ajili ya miradi mingine mingi" aliongeza Mkuu huyo wa Wilaya ya
Meatu.
Ujenzi
wa zahanati hiyo ambayo imefikia asilimia 63 unatarajiwa kupunguza kwa kiasi
kikubwa changamoto ya akina mama na watoto kutembea umbali mrefu kufuata huduma
za afya, huku madarasa na ofisi za walimu zilizofikia asilimia 75 zikitarajiwa
kuboresha mazingira ya kujifunzia na kufundishia.
Akitoa taarifa ya utekelezaji wa miradi hiyo
inayotokana na shughuli za uhifadhi na utalii kupitia Uwekezaji Mahiri (SWICA)
ndani ya hifadhi ya Maswa iliyoanza Oktoba 25, 2025 na kutarajiwa kukamilika
Disemba 2025, Afisa Uhifadhi kutoka TAWA Kanda ya Ziwa Lusato Masinde alisema
ujenzi wa zahanati ambayo itakuwa na wodi ya mama na mtoto, OPD na RCH
itagharimu kiasi cha zaidi ya shillingi millioni 286 huku ujenzi wa madarasa
manne na ofisi mbili za walimu ukigharimu kiasi cha shillingi millioni 216.7.
Baadhi ya wananchi wameeleza furaha yao
kutokana na miradi hiyo, wakisema kuwa imefika wakati muafaka na itaongeza
imani na matumaini kwa Serikali yao huku
TAWA ikiahidi kusimamia kikamilifu utekelezaji wa miradi hiyo ili
ikamilike kwa wakati na kwa ubora unaotakiwa.
Kupitia miradi hii, Meatu inatarajiwa kupiga
hatua kubwa katika kuboresha huduma za kijamii na kuimarisha uhusiano kati ya
wananchi na TAWA.
0 Maoni