Katika kauli kali na isiyo na shaka, Msemaji Mkuu wa Serikali ya Jamhuri
ya Muungano wa Tanzania, Gerson Msigwa ametoa msisitizo kuhusu dhana ya mikopo ya kimataifa, akieleza
wazi kwamba fedha za mkopo hazipaswi kuchukuliwa kama misaada.
Msemaji huyo, ambaye mara kwa mara hukabiliwa na changamoto za upotoshaji
wa maneno yake kwenye mitandao ya kijamii, alitumia mkutano wake na waandishi
wa habari hivi karibuni kutoa ujumbe mkali kwa umma.
Akisisitiza uhalisia wa matumizi ya mikopo ya kimaendeleo, Msemaji huyo
alitaka Watanzania wawe na uelewa mpana juu ya fedha hizo.
"Msisitizo – Mkopo sio msaada, fedha za mkopo ni fedha zetu wenyewe
kwa sababu tunalipa," alitamka Msemaji huyo, akisisitiza kwamba deni
lolote linalochukuliwa ni jukumu la taifa na linarejeshwa kwa kodi za wananchi.
Kauli hii inalenga kuondoa dhana potofu miongoni mwa baadhi ya wananchi
na wadau ambao huenda wanachukulia mikopo mikubwa kutoka nje kama zawadi au
misaada isiyohitaji kurejeshwa.
Kama ilivyo kawaida yake ya kujibu kwa ukali majaribio ya kupotosha
taarifa zake, Msemaji huyo pia alitoa onyo la wazi kwa wale wanaojaribu
kukatakata maneno yake ili kuchochea hisia au upotoshaji wa umma.
"Wale mnaohangaika kukatakata maneno yangu ili mpotoshe umma, kula
chuma hicho," alisema Msigwa wakati akifafanua mambo katika mkutano wake
na waandishi wa habari hivi karibuni, akionesha dhamira ya Serikali ya
kutovumilia uhariri mbaya au utoaji wa taarifa za uongo na za upotoshaji.
Alisema miradi itaendelea kutekelezwa kwa fedha za ndani na huku
wakiendelea kuzungumza na wadau wa maendeleo kwani si mara ya kwanza wao kutoa
matamko yao na baadae wakakutana na kuendelea na mipango husika.
0 Maoni