MKOA wa Mara
umeendelea kunufaika na uwekezaji wa Sekta ya Madini baada ya kutekeleza zaidi
ya miradi 398 ya maendeleo yenye thamani ya Shilingi Bilioni 33.81 katika
wilaya zote ndani ya kipindi cha miaka minne chini ya Serikali ya Awamu ya
Sita, hatua inayolenga kuboresha ustawi wa wananchi.
Akizungumza
hivi karibuni kwa niaba ya Afisa Madini Mkazi wa Mkoa wa Mara, Afisa Mazingira,
Byalugaba Chakupewa alisema utekelezaji wa miradi ya Uwajibikaji kwa Jamii
(CSR) kutoka migodi ya kati na midogo umeendelea kuleta matokeo chanya katika
maeneo mbalimbali.
Alisema
michango ya kampuni za uchimbaji madini imeendelea kusaidia miradi ya kijamii,
ikiwemo Shilingi milioni 40 zinazotolewa na ZEM (T) Co Ltd katika Wilaya ya
Butiama, Shilingi milioni 40 za Polygold kwa Halmashauri ya Musoma, na Shilingi
milioni 125 zinazotolewa na MMG Gold Mine kwa ajili ya ujenzi wa zahanati ya
Seka, madarasa Kalusenyi, ofisi ya kijiji cha Kaboni pamoja na jiko la gesi
katika Shule ya Sekondari Kasoma.
Aidha,
alisema kupitia mpango wa vijana wa Mining for the Brighter Tomorrow (MBT),
vikundi 53 vyenye jumla ya vijana 1,998 vimepatiwa leseni za uchimbaji mdogo,
hatua inayoongeza ajira na ushiriki wa vijana katika uchumi wa madini.
Kwa upande
wake, Meneja Uhusiano wa Mgodi wa Barrick North Mara, Francis Uhadi, alisema
mgodi huo umetumia Shilingi bilioni 26 kutekeleza miradi ya jamii kuanzia mwaka
2019 hadi 2025.
Aliongeza
kuwa kampuni hiyo imetenga Dola milioni 1.8 kila mwaka kwa ajili ya maendeleo
ya wananchi wanaoishi jirani na mgodi, sambamba na kulipa zaidi ya Shilingi
bilioni 2 za mrabaha kila robo mwaka.
Alisema
zaidi ya watoto 500 tayari wamenufaika na mfuko wa elimu wa mgodi huo, ingawa
bado kuna changamoto ya baadhi ya jamii kushindwa kutambua vipaumbele vya
maendeleo, hali iliyosababisha Barrick kuanzisha mpango mkakati wa miaka mitano
unaolenga kushughulikia mahitaji ya msingi kama upatikanaji wa maji na
barabara.
Uhadi
alibainisha kuwa mgodi umejenga tanki kubwa la maji lenye ujazo wa lita 300,000
linalohudumia vijiji vya Matongo, Mjini Kati, Nyabichune na Nyang’oto, huku
kiwango cha manunuzi ya wazawa kikifikia asilimia 91, ikiwa ni sehemu ya
kuimarisha ‘local content’ katika shughuli za mgodi.
Mwenyekiti
wa Bodi ya Maji Nyamongo, Dotto Manyeli, alisema mradi huo wa maji umeajiri
watu 20 na umewezesha taasisi za elimu na afya kupata huduma ya maji ya uhakika
na ya gharama nafuu.
Kwa upande
wa wazawa wanaotoa huduma, Mkurugenzi wa Roebray Enterprises & Supplies
Ltd, Rhobi Alphonce, alisema licha ya mafanikio makubwa waliyopata katika
kuhudumia mgodi, wamekumbana na changamoto za usimamizi wa wafanyakazi, hali
iliyowalazimu kuboresha mifumo ya ajira ili kulinda usalama na siri za kampuni.
Katika sekta
ya elimu, Mkuu wa Shule ya Sekondari Nyabichune, Innocent Mushi, alisema
maabara iliyojengwa na Barrick North Mara imeleta mabadiliko makubwa katika
ufundishaji wa masomo ya sayansi, ambapo wanafunzi sasa wanafanya mazoezi kwa
vitendo tofauti na ilivyokuwa awali.
Alisema
hatua hiyo imeongeza ufaulu na kuongeza uelewa wa wanafunzi katika
masomo ya sayansi.
0 Maoni