Mafuriko yaua 400, Pakistan, Kashmir ya India na Nepal

 

Mafuriko ya ghafla yaliyosababishwa na mvua kubwa yameua zaidi ya watu 400 katika maeneo mbalimbali ya Pakistan, Kashmir inayosimamiwa na India, na Nepal, kwa mujibu wa mamlaka, huku watu wengi wakiwa bado hawajapatikana.

Kaskazini magharibi mwa Pakistan, watu wasiopungua 321 wamefariki ndani ya kipindi cha saa 48, mamlaka za mitaa ziliripoti Jumamosi, huku vijiji zaidi ya kumi katika eneo la Buner, mkoa wa Khyber Pakhtunkhwa, vikiwa vimeharibiwa vibaya na mafuriko ya ghafla.

Barabara zilizosombwa na maporomoko ya ardhi zimewazuia wahudumu wa dharura kufika katika maeneo yaliyoathirika huko Buner, ambako inahofiwa kuwa watu wengine kadhaa wamefukiwa chini ya vifusi, kwa mujibu wa Bilal Faizi, Msemaji wa Shirika la Uokoaji la Rescue 122.

"Zaidi ya miili 120 tayari imeopolewa kutoka eneo hili pekee. Hadi siku chache zilizopita, hapa palikuwa na jamii hai na yenye shughuli. Sasa, hakuna kilichobaki zaidi ya mawe makubwa na mabaki ya uharibifu," Faizi aliwaambia waandishi wa habari.