Sekondari ya kwanza kijiji cha Muhoji kufuguliwa mwezi huu

 

Kijiji cha Muhoji kimeamua kujenga sekondari yake ili kutatua tatizo la umbali mrefu wanaotembea watoto wa kijiji hicho kwenda masomoni kwenye Sekondari ya Kata iliyopo Kijijini Masinono.

Taarifa iliyotolewa na Mbunge wa Jimbo la Musoma Vijijini Prof. Sospeter Muhongo imesema Muhoji Sekondari ipo tayari, mwezi huu (Januari 2025) kuanza kupokea wanafunzi wa Kidato cha Kwanza kutoka kijijini humo.

Kukamilika kwa ujenzi wa sekondari hiyo iliyojengwa kwa nguzu ya wanakijiji, kutasaidia kuondokana na adha ya wanafunzi kutembea umbali mrefu wa kilomita kumi kwenda sekondari ya kata, imesema taarifa hiyo.

Ujenzi wa sekondari hiyo ulianza kwa kupitia Harambee za Mbunge wa Jimbo la Musoma Vijijini, Prof. Sospeter Muhongo, ambae amechangia fedha zake binafsi.

Prof. Muhongo amesema, Mfuko wa Jimbo umechangia baadhi ya vifaa vya ujenzi, Wanakijiji wamechangia fedha za ujenzi na nguvukazi zao. Serikali nayo imetia mkono kwa kuchangua shilingi milioni 75.

Sekondari hii mpya, kwa miaka ya karibuni, itapokea wanafunzi kutoka vijiji jirani vya Kaburabura (Kata ya Bugoji), Saragana (Kata ya Nyambono) na hata wanafunzi kutoka Wilaya ya Bunda, Kitongoji jirani sana cha Kinyambwiga.

Hadi sasa Muhoji Sekondari imekamilika ujenzi wa vyumba vya madarasa vitatu, ofisi moja, vyoo: matundu 8 wasichana, na 6 wavulana, chumba cha maktaba pamoja na chumba cha huduma ya kwanza (matibabu).