Salamu za Krismasi za Askofu Dkt. Bagonza

 

Askofu wa KKKT, Dayosisi ya Karagwe Dkt. Benson Bagonza

Habari za maskini kutajirisha matajiri si ngeni kwetu. Tumewaona wakulima maskini wakitajirisha matajiri, waumini maskini wakiwatajirisha wahubiri, Boda boda maskini wakiwatajirisha wauza pikipiki na maaskari barabarani na wapiga kura maskini wakitengeneza viongozi matajiri lakini maskini hawa hatuwezi kuwaita kuwa ni Yesu Kristo.

Wakati huo huo hatuwaoni matajiri wanaowatajirisha maskini tunachokiona ni atajiri wanaodhani wana bidii na akili na maskini wanaoambiwa ni wavivu na hawana akili. Kwao hawa matajiri kutajirika ni akili na ujanja.

Hawa matajiri huwaona maskini kuwa ni wavivu na wasio na akili. Ukweli ni kwamba utajiri na umaskini vina uhusiano wa karibu sana na mara nyingi uhusiano huu umejengwa katika unyonyaji.

Kuzaliwa kwa Yesu kulileta picha tofauti.

Yeye alikuwa tajiri ili maskini wawe matajiri na alizaliwa katika hali ya umaskini ili sisi tuwe matajiri. Maskini na matajiri wote wana nafasi katika kuzaliwa kwa Yesu lakini kwa namna pekee Yesu alizaliwa kwa ajili ya waliokosa tumaini na kukosa mtetezi.

Jamii yetu inalo la kujifunza kutoka kwa Yesu Kristo. Tunaalikwa kumtazama Yesu katika sura ya wanaoteseka.

Mtazame Yesu katika sura ya Mpalestina anayeteketezwa na mabomu ya nchi tajiri.

Mtazame Yesu kama mtu wa Ukraine anayekaangwa kwa mabomu ya ubabe wa Urusi . Mtazame Yesu kama mwanaharakati anayepigania haki ya Kidemokrasia anayetekwa na kupotezwa kama gaidi.

Mtazame Yesu kama mtu maskini anayelazimika kununua haki zake katika ofisi za umma. Mtazame Yesu kama mwananchi maskini anayelazimika kununua uponyaji na wokovu wake. Mtazame Yesu kama mtu asiye mwanachama wa chama chochote anayepoteza haki ya kuchaguliwa kuwa kiongozi na kuishia kuwachagua wengine wamwongoze.

Na haya yanapotokea mtazame Yesu katika sura ya jamii inayokosa haki wakati watu wote wako kimya.