Radi yaua watu watano wa familia moja Chunya

 

Jeshi la Polisi Mkoa wa Mbeya limesema kuwa watu watano wa familia moja wamekufa kwa kupigwa na radi wakiwa kwenye kambi ya kuchungia ng'ombe wakati wakiwa wamelala Wilaya ya Chunya.

Kamanda wa Polisi Mkoa wa Mbeya, SACP Benjamin Kuzaga amesema tukio hilo lilitokea tarehe 29/12/2024 saa 8:30 usiku katika Kitongoji cha Nkangi kilichopo Kijiji cha Isangawana, Kata ya Matwiga, Tarafa ya Kipembawe, Wilaya ya Chunya.

“Watu hao watano wa familia moja ya Masiganya Scania (39) anayejishughulisha na ufugaji, mkazi wa Nkangi walifariki dunia baada ya kupigwa radi kwenye kambi ya kuchungia ng'ombe wakati wakiwa wamelala,” amesema Kamanda Kuzaga.

Amewataja waliofariki kwenye tukio hilo kuwa ni Balaa Scania (28), Kulwa Luweja (17), Masele Masaganya (16), Hema Tati (10) pamoja na Manangu Ngwisu (18) wote wakazi wa Kijiji cha Nkangi.

Aidha, katika tukio hilo watu wengine watano walijeruhiwa ambao ni Gulu Scania (30), Manyenge Masaganya (13), Seni Solo (13), Paskali Kalezi (16) na Huzuni Kalezi (19) wote wakazi wa Kijiji cha Nkangi.

Kamanda Kuzaga amesema chanzo cha tukio hilo ni mvua kubwa iliyonyesha usiku ikiambatana na radi hivyo kusababisha vifo vya watu watano na wengine watano kujeruhiwa.

Majeruhi walikimbizwa katika Kituo cha Afya Isangawana kwa matibabu na walitibiwa na kuruhusiwa kwenda nyumbani baada ya hali zao kuwa nzuri.