Rais wa Zanzibar na Mwenyekiti wa Baraza la Mapinduzi, Dk. Hussein Ali Mwinyi, amezisihi Taasisi ya Kuzuia na Kupambana na Rushwa (TAKUKURU) na Mamlaka ya Kuzuia Rushwa na Uhujumu Uchumi Zanzibar (ZAECA) kuongeza ushirikiano katika ufanisi wa kazi zao.
Dk. Mwinyi alitoa nasaha hizo Ikulu, Zanzibar, alipozungumza
na Mkurugenzi Mkuu wa TAKUKURU, Ndugu. Crispin Francis Chalamila, aliyefika
kujitambulisha kufuatia uteuzi wake uliofanywa na Rais wa Jamhuri ya Muungano
wa Tanzania, Mhe. Dkt. Samia Suluhu Hassan, hivi karibuni.
Rais Dk. Mwinyi amezishauri taasisi hizo mbili kuzidisha
ushirikiano hasa kwenye miradi ya kimkakati ya maendeleo kwa maslahi ya taifa.
Akizungumza kwa wakati huo, Ndugu. Chalamila amemuahidi Rais
Dk. Mwinyi kuendeleza ushirikiano uliopo kati ya ZAECA na TAKUKURU katika
kufanikisha majukumu ya taasisi hizo.
Vilevile, Bw. Chalamila amesifu na kupongeza juhudi za
maendeleo makubwa zilizofikiwa na Serikali ya Mapinduzi ya Zanzibar chini ya
uongozi wa Rais Dk. Mwinyi.
Amesema, mbali na majukumu mengine waliyonayo, TAKUKURU na ZAECA imekuwa rahisi kwao kushirikiana, hasa katika kudhibiti wahalifu wa pande mbili za Muungano wanaojaribu kukimbilia mipaka ya Bara na Zanzibar.
0 Maoni