Tanzania imetangaza kufungua tena ubalozi wake jijini Luanda nchini Angola, hatua inayolenga kuimarisha uhusiano wa kidiplomasia na kupanua ushirikiano na nchi hiyo katika biashara, uwekezaji na sekta nyingine za kimkakati.
Uamuzi huo umetangazwa na Rais wa Jamhuri ya Muungano wa Tanzania, Dkt. Samia Suluhu Hassan, wakati wa mazungumzo rasmi na Rais wa Jamhuri ya Angola, João Manuel Gonçalves Lourenço, leo, Oktoba 29, 2026, Ikulu jijini Dar es Salaam.
Rais Lourenço yuko nchini kwa ziara ya kitaifa, ikiwa ni ya pili kufanywa na Rais wa Angola tangu ziara ya Rais wa kwanza na mwanzilishi wa nchi hiyo, Hayati António Agostinho Neto, mwaka 1979.
Akizungumza na waandishi wa habari, Rais Dkt. Samia amesema kiwango cha biashara kati ya Tanzania na Angola bado ni cha chini licha ya uhusiano wa muda mrefu na fursa zilizopo katika mataifa hayo mawili.
Ili kukuza biashara, Tanzania imeikaribisha Angola kununua mazao yake ya chakula, huku ikiangalia fursa ya kuagiza bidhaa za petroli na mbolea kutoka nchini humo.
Ili kurahisisha biashara, nchi hizo mbili zimekubaliana kuunganisha Reli ya Benguela nchini Angola na TAZARA kupitia Zambia na Jamhuri ya Kidemokrasia ya Kongo, hatua itakayowezesha usafirishaji wa mizigo kati ya Bandari ya Lobito katika Bahari ya Atlantiki na Bandari ya Dar es Salaam katika Bahari ya Hindi.
Katika sekta ya usafiri wa anga, Rais Dkt. Samia amesema Tanzania na Angola zinalenga kuanzisha safari za ndege zitakazounganisha nchi hizo moja kwa moja bila kupitia nchi nyingine.
“Kwa sasa, tunataka kuanzisha safari za moja kwa moja kati ya Dar es Salaam na Luanda,” amesema Rais Dkt. Samia.
Katika sekta ya nishati, Rais Dkt. Samia amesema Shirika la Maendeleo ya Petroli Tanzania (TPDC) limeanza kutathmini uwezekano wa kuwekeza katika kiwanda cha kusafisha mafuta cha Lobito nchini Angola.
Nchi hizo pia zimekubaliana kubadilishana uzoefu katika kuongeza thamani ya madini na kuwajengea uwezo wataalamu na wachimbaji wadogo ili waweze kunufaika zaidi na rasilimali hizo.
Kwa upande wake, Rais Lourenço ametambua mchango wa Tanzania chini ya Baba wa Taifa, Hayati Mwalimu Julius Kambarage Nyerere, katika kusaidia harakati za ukombozi wa Angola zilizoongozwa na Hayati Dkt. António Agostinho Neto. Amesema viongozi wa sasa wana wajibu wa kuendeleza urafiki huo kwa kukuza uchumi na kuboresha maisha ya wananchi.
Katika sekta ya afya, Rais Lourenço amesema Angola inalenga kuajiri kwa mikataba wataalamu wa afya kutoka Tanzania ili kukabiliana na upungufu wa watumishi katika hospitali zake zinazoongezeka.
Amesema nchi yake itashirikiana na Tanzania katika kubadilishana utaalamu na kutoa mafunzo kupitia taasisi za elimu ya tiba, pamoja na kuboresha huduma za afya ya mama na mtoto.
“Hata tuwe na rasilimali nyingi kiasi gani, hatuwezi kufikia maendeleo na kuboresha maisha ya wananchi wetu bila kushirikiana,” amesema Rais Lourenço, akisisitiza umuhimu wa nchi za Afrika kutumia uwezo uliopo miongoni mwao kukabiliana na changamoto za maendeleo.
Katika hatua nyingine, viongozi hao wameshuhudia kusainiwa kwa mikataba na hati za makubaliano ya ushirikiano katika sekta za anga, mawasiliano na hali ya hewa.
Rais Lourenço ataendelea na ziara yake kesho mkoani Dodoma, ambapo, akiambatana na mwenyeji wake, atashiriki katika hafla ya uzinduzi wa majengo ya ofisi za wizara na taasisi za Serikali, pamoja na barabara za lami katika Mji wa Serikali wa Mtumba.
0 Maoni