Hispania inaanza siku tatu za maombolezo baada ya watu wasiopungua 68 kufariki dunia na wengine kadhaa kujeruhiwa katika mojawapo ya ajali mbaya zaidi za treni kuwahi kutokea barani Ulaya katika historia ya kisasa.
Waokoaji walifanya kazi usiku kucha wakitumia taa zenye mwanga mkali kukata vyuma vya mabehewa ya treni katika juhudi za kutafuta wahanga, huku utambuzi wa miili ya wengi waliofariki katika ajali hiyo ukiwa bado haujakamilika.
Mamlaka zinaendelea kuchunguza chanzo cha ajali hiyo iliyotokea Jumatano asubuhi, baada ya treni iliyokuwa ikisafiri kutoka Madrid kwenda Seville kuigonga kwa nguvu treni nyingine iliyokuwa imesimama kwenye reli.
Waziri Mkuu wa Hispania, Pedro Sánchez, amesema taifa hilo lote linaomboleza, akiongeza kuwa maisha ya watu yamevurugika, familia zimegawanyika kutokana na vifo vya wapendwa wao na maumivu ni makubwa mno.
Kwa mujibu wa Wizara ya Mambo ya Ndani ya Hispania, mamia ya wahudumu wamepelekwa katika eneo la ajali kusaidia shughuli za uokoaji na uondoaji wa mabaki ya treni. Droni na helikopta pia zinatumika kutafuta wahanga na kuondoa vifusi.
Treni iliyokuwa imesimama, inayoendeshwa na kampuni binafsi ya usafiri wa reli ya Iryo, ilikuwa na abiria 147. Waziri wa Uchukuzi wa Hispania, Óscar Puente, amesema treni hiyo ilisimama kwenye reli kutokana na hitilafu ya mfumo wa kompyuta.
0 Maoni