Shirika la Reli Tanzania (TRC) limesema ujenzi wa kipande cha reli ya kisasa (SGR) kutoka Tabora hadi Kigoma unatarajiwa kuajiri watu 15,000 huku ukitoa fursa za kiuchumi kwa takriban watu 100,000 watakaotoa huduma mbalimbali pembezoni mwa mradi huo wa kihistoria.
Mkurugenzi Mkuu wa TRC, Machibya Shiwa, akizungumza kupitia kipindi cha Jambo Wikiendi cha TBC 1, alieleza kuwa mradi huo utaleta mapinduzi makubwa kwa mkoa wa Kigoma ambao awali haukuwa na mchango mkubwa kwenye uchumi wa taifa, akibainisha kuwa uhaba wa nyumba mkoani humo ni fursa kwa wananchi kuwekeza huku akisisitiza kuwa TRC inaendelea kufanya tafiti za nishati mbadala na matengenezo makubwa maeneo dhaifu ili kukabili changamoto za miundombinu na usumbufu unaoweza kujitokeza.
Shiwa aliongeza kuwa mradi umegawanywa katika vipande ili kukabiliana na changamoto za rasilimali fedha na mitambo, huku takwimu zikionyesha kuwa takriban asilimia 10 ya abiria wanaokata tiketi za madaraja ya Royal na Business hushindwa kusafiri licha ya kulipia.
Waziri wa Uchukuzi, Profesa Makame Mbarawa, alieleza kuwa reli hiyo inayojengwa kwa Dola za Marekani bilioni 2.74 itapunguza muda wa safari kati ya Dar es Salaam na Kigoma kutoka zaidi ya saa 30 hadi saa nane, kuunganisha nchi na ukanda wa Maziwa Makuu na Afrika ya Kati, na kuimarisha mtandao hadi Musongati nchini Burundi kupitia Uvinza.
Profesa Mbarawa alibainisha kuwa
bandari za Ziwa Tanganyika zilihudumia tani 815,285 za shehena katika mwaka wa
fedha 2025/2026 kutoka tani 397,897 za mwaka uliopita.
0 Maoni