Waziri wa Madini, Mheshimiwa Anthony Mavunde
akiwa ziarani Wilayani Nyang'wale amewaasa na kuwataka wamiliki wa leseni za
uchimbaji wa madini kuzingatia Sheria ya Madini Sura ya 123 na Kanuni zake
katika utekelezaji wa majukumu yao.
Akizungumza katika ziara hiyo iliyofanyika
kwenye eneo la mgodi wa Kasubuya wilayani Nyang’hwale, Waziri Mavunde amesema
wachimbaji wadogo kwa sasa wanachangia zaidi ya asilimia 40 ya mapato
yatokanayo na sekta ya madini, akibainisha kuwa mchango wao unaendelea
kuongezeka kutokana na maboresho makubwa ya Sheria, Kisera na Kiutendaji
yanayofanywa na Serikali.
Waziri Mavunde aliongeza kuwa kufuatia
mabadiliko ya Sheria ya mwaka 2024, kuanzia Oktoba 1, 2024, Benki Kuu ya
Tanzania (BoT) ilianza ununuzi rasmi wa dhahabu nchini na kufanikiwa kununua
zaidi ya tani 15 hadi sasa. Hatua hiyo imeiwezesha Tanzania kuingia kwenye
orodha ya nchi 10 bora barani Afrika zinazomiliki hifadhi kubwa ya dhahabu.
Akiwahimiza wachimbaji na wamiliki wa Leseni
kuzingatia Sheria, Waziri Mavunde amesisitiza kuwa leseni za uchimbaji
hazipaswi kupangishwa wala kuachwa bila kuendelezwa na kutaka wamiliki wa
Leseni kuzingatia kanuni mpya zinazohitaji kuingia makubaliano na wamiliki wa
maduara na kuyasajili makubaliano hayo ofisi ya Tume ya Madini.
“Mtu yoyote ambaye amepewa leseni anatakiwa
aiendeleze. Hakuna kuhodhi eneo bila shughuli za maendeleo. Leseni zote
zisizoendelezwa, nataka niwahakakikishie ninakwenda kuzifuta mara moja ili
wapewe wengine wenye uwezo wa kuziendeleza” amesema.
Katika kuboresha huduma za uchunguzi wa
madini, Mavunde ametangaza kuwa Serikali inajenga maabara tatu kubwa katika
mikoa ya Geita, Dodoma na Chunya ili kurahisisha upatikanaji wa huduma kwa
wachimbaji.
Amesema pia, Mhe. Rais Dkt. Samia Suluhu
Hassan ameagiza kufanyika kwa Utafiti wa kina wa madinini ambapo kwasasa Wizara
inajipanga kutekeleza mradi wa ununuzi wa helikopta kwa ajili ya kufanya
utafiti wa kina wa maeneo yenye madini na kuwasaidia wachimbaji wadogo kupata
taarifa sahihi na kuondokana na uchimbaji wa kubahatisha.
Kuhusu kupanda kwa bei na upungufu wa kemikali
ya sayanaidi, Waziri Mavunde amesema tarehe 2 Desemba 2025 kutafanyika kikao
maalum kati ya Wizara ya Madini, Tume ya Madini na Ofisi ya Mkemia Mkuu wa
Serikali ili kutafuta suluhisho na hatua za kukabiliana na hali hiyo kwa
wachimbaji wadogo.
Kwa upande wake, Mkuu wa Wilaya ya
Nyang’hwale, Grace Kingalame, amempongeza Waziri Mavunde kwa usimamizi imara
unaoendelea kuinufaisha jamii ya wachimbaji wadogo.
Naye, Mbunge wa Nyang’hwale, Mhe. Hussein
Nassor Amar, ameomba leseni za utafiti ambazo hazifanywi kazi zifutwe na
kugawiwa kwa wachimbaji wadogo.
Pia, Mwenyekiti wa Vijana Wachimbaji Madini
Taifa, Khamis Mohamed, amemshukuru Waziri kwa kuendeleza programu ya MBT, na
kuomba maeneo yenye taarifa sahihi ya uwepo wa madini yatengwe kwa ajili ya
vijana, wanawake na watu wenye mahitaji maalum.
Mwisho, Waziri Mavunde ametoa wito wa
kudumisha amani katika maeneo yote ya uchimbaji.
“Tanzania ni nchi ya amani. Naomba tuendelee
kuilinda kwa wivu mkubwa na kuheshimiana katika shughuli za uchimbaji,”
amewaasa wachimbaji madini nchi.
0 Maoni