Waziri wa
Maendeleo ya Jamii, Jinsia, Wanawake na Makundi Maalum, Mhe. Dkt. Dorothy
Gwajima amewataka watumishi wa Wizara hiyo kuongeza bidii na kasi zaidi kwenye
kutimiza wajibu wao ili kuharakisha maendeleo ya jamii.
Dkt Gwajima amesema
hayo Novemba 18, 2025 alipowasili katika
Ofisi za Wizara hiyo baada ya hafla ya kuapishwa kuendelea kuongoza Wizara hiyo
kwa kipindi cha pili cha Serikali ya awamu ya Sita.
Dkt. Gwajima
amesema katika kipindi cha kwanza cha Serikali ya Awamu ya Sita kilitumika
kuijenga Wizara mpya kwa kuanzisha mifumo ya uendeshaji, uwajibikaji, kutunga
sera mbalimbali, mikakati, miongozo ya kisera na programu kadhaa za utekelezaji
sambamba na kuitambulisha Wizara kwenye jamii na wadau wa maendeleo.
Ameongeza kuwa
katika kipindi cha pili cha Serikali ya Awamu ya Sita kitajikita katika kujenga
ushirikiano na mshikamano wa wadau wote katika kuelimisha jamii kuhusu uwepo wa
fursa mbalimbali za kiuchumi na kuwasaidia kuzifikia kwani umaskini unachangia
sehemu kubwa ya ukatili wa kijinsia na kwa makundi maalum.
"Mheshimwa
Rais wa Jamhuri ya Muungano wa Tanzania Dkt. Samia Suluhu Hassan, ameendelea
kuniamini na kuniteua tena kuongoza Wizara hii na imani hii na heshima hii ni
yenu pia kwa kuwa, mlinipa ushirikiano mkubwa kwenye kutekeleza majukumu yangu,
hivyo basi nawaomba tena tuendelee kufanya kazi kwa spidi zaidi, ari na ufanisi
ili kutimiza azma ya Serikali. amesema Dkt Gwajima.
Kwa upande
wake Naibu Waziri Maendeleo ya Jamii, Jinsia, Wanawake na Makundi Maalum, Mhe.
Maryprisca Mahundi amewashukuru
watumishi wa Wizara kwa mapokezi na kusema yupo tayari kufanya kazi hivyo
ameomba ushirikiano ili kufanikisha malengo ya Wizara na Serikali.
Awali
akiwakaribisha viongozi hao, Katibu Mkuu wa Wizara ya Maendeleo ya Jamii,
Jinsia Wanawake na Makundi Maalum, Dkt. John Jingu amewapongeza kwa kuteuliwa
na Rais wa Jamhuri ya Muungano wa Tanzania Mhe. Samia Suluhu Hassan na
kuwaahidi kupata ushirikiano kutoka kwa Menejimenti na watumishi wa Wizara
hiyo.
Na Abdala
Sifi WMJJWM - Dodoma
0 Maoni