Watumishi wapya wa Halmashauri ya Wilaya ya
Longido wametakiwa kuzingatia maadili ya utumishi wa umma wanapotekeleza
majukumu yao ya kila siku.
Kauli hiyo imetolewa leo, Novemba 26, 2025, na
Kaimu Mkurugenzi Mtendaji wa Halmashauri hiyo, Bw. Nestory Dagharo, wakati
akifungua mafunzo maalumu kwa watumishi hao yaliyofanyika katika ukumbi wa
mikutano wa Halmashauri.
Bw. Dagharo amewapongeza watumishi hao kwa
kupata fursa ya kuajiriwa katika utumishi wa umma, akibainisha kuwa Serikali
imewaamini katika kuwahudumia wananchi. Ametaka kuhakikisha wanatimiza wajibu
wao kwa uadilifu na kuzingatia misingi ya maadili.
“Mafunzo haya ni muhimu sana katika kuwajengea
uelewa wa kanuni, taratibu na sheria zinazowaongoza kama watumishi wa umma. Cha
msingi ni kuhakikisha kila mtumishi anazingatia maadili wakati wote wa
kutekeleza majukumu,” amesema Dagharo.
Akifunga mafunzo hayo, Bw. Dagharo
amewakumbusha washiriki kuyafanyia kazi mafunzo yote waliyopatiwa, na
kuwasisitiza wasisite kuuliza maswali wanapokutana na changamoto katika
utekelezaji wa kazi zao.
Ameongeza kuwa ni muhimu kwao kutoa huduma
bora na kwa weledi kwa wananchi, pamoja na kujenga mahusiano mazuri na
watumishi wenzao.
Kwa upande wake, Mkuu wa Idara ya Utawala na
Utumishi, Bw. Peter Matemba, amesema mafunzo hayo yametolewa kwa watumishi
walioajiriwa kuanzia Februari hadi Oktoba mwaka huu. Ameeleza kuwa utumishi wa
umma unaendeshwa kwa kuzingatia Miongozo, Kanuni, Taratibu na Sheria, hivyo
amewataka kuzifuata kikamilifu ili kuepuka migongano na mwajiri.
Naye Kamanda wa TAKUKURU Wilaya ya Longido,
Bi. Mwazani Mohamed, amewataka watumishi hao kuwa waadilifu, kushirikiana, kuwa
na weledi katika kazi na kutunza siri za ofisi. Amewatahadharisha kuepuka
kutumia ofisi kwa maslahi binafsi, na kutojihusisha na vitendo vya rushwa
vinavyosababishwa na tamaa na uchu wa madaraka.
Katika mafunzo hayo, mada zilizowasilishwa ni
kuhusu Haki na Wajibu wa Watumishi wa Umma, Utawala Bora, Mfumo wa ESS na Fursa
za Mikopo kutoka Benki ya NMB na CRDB.
0 Maoni