Pongezi na shukrani za Msemaji Mkuu wa Serikali Gerson Msigwa kwa waandishi wa habari nchini kwa kuonesha uwajibikaji wakati wa matukio ya vurugu ya Oktoba 29, zimepokelewa kwa hisia tofauti. Hata hivyo, uchambuzi wa kina unaonesha kuwa, wale wanaobeza kauli hiyo huenda hawaelewi uzito na majukumu makubwa ya vyombo vya habari katika kulinda amani ya taifa, hasa wakati wa machafuko.
Mmoja waandishi wakongwe na Mwenyekiti wa Tanzania Bloggers Network(TBN)
Beda Msimbe akizungumzia kuhusu kauli ya pongezi kwa waandishi wa habari
alisema" katika mazingira ya kawaida kabisa Msemaji Mkuu wa serikali alifanya vyema kutoa pongezi kwa ukomavu
ulioneshwa na vyombo vya habari. Waandishi waliwajibika, waandishi wameonesha
uzalendo kwa kutanguliza maslahi ya taifa kuliko maslahi binafsi au ya vyama na
hivyo kuzuia moto"
Jukumu la Kijamii la Vyombo vya Habari
Wakati wa machafuko, vyombo vya habari huacha jukumu la kawaida la
kuripoti matukio tu na kuingia katika jukumu la Kimkakati la Kulinda Utulivu,
hivyo wanatengeneza uwajibikaji kwanza, anasema Msimbe. Uwajibikaji katika
muktadha huu unamaanisha kuzuia kueneza kwa taarifa zisizothibitishwa (uvumi)
au picha/video zinazoweza kuchochea hasira na vurugu zaidi. Waandishi
wanapunguza kiwango cha 'kuzidisha mambo' na 'kuleta jazba' kwa umma.
"Waandishi wangekosa uwajibikaji, wangekuwa daraja kuu la wanasiasa
au makundi yenye ajenda hasi kutumika vibaya kuharibu nchi. Pongezi hizi
zinathibitisha kuwa walizuia nchi kutumika vibaya kuharibu amani" anasema
Msimbe.
Dhamana ya Amani Katika Mafunzo
Umuhimu wa pongezi hizi unajikita katika msingi wa mafunzo wanayopitia
waandishi, hasa wakati wa kuelekea uchaguzi au matukio nyeti. Waandishi
walikumbushwa mara kwa mara juu ya umuhimu wa:Kudumisha Utaratibu Katika
Machafuko (Maintaining Order in Chaos): Lengo si kuripoti ghasia tu, bali
kuripoti kwa namna inayoimarisha utulivu na kuheshimu sheria.
Tanzania ni ya Watanzania:
Kwa kuonesha uwajibikaji, waandishi wameonesha uzalendo kwa kutanguliza
maslahi ya taifa kuliko maslahi binafsi au ya vyama na kuwezesha taifa kuanza
mchakato wa uponyaji (healing process) mapema.
Kutibu Majeraha:
Badala ya kufungua majeraha mapya kwa kuripoti kwa jazba, uwajibikaji
husaidia kuelekeza jamii kwenye mazungumzo, maridhiano, na utatuzi wa
changamoto. Hii inaruhusu Serikali kujikita katika utawala na maendeleo.
Uzalendo:
Kuwapongeza ni kutambua kazi iliyowezesha taifa kusonga mbele licha ya
tukio hilo. Pongezi hizo si tu kwa ajili ya Serikali, bali ni kwa ajili ya
ustawi wa Watanzania milioni 62 ambao wanahitaji utulivu kuendelea na shughuli
zao.
Pongezi na Wito wa Kuendelea
Vyombo vya habari vilionyesha ukomavu na ustadi mkubwa katika hali ngumu.
Hivyo, Msemaji Mkuu wa Serikali hakusema jambo baya, bali alitambua wajibu
mkubwa wa Uzalendo uliotimizwa.
Tunapongeza sana Waandishi wa Habari kwa jukumu hili muhimu. Umma
unahimizwa kutambua kuwa kazi ya uwajibikaji wakati wa migogoro huenda isipewe
likes nyingi au 'views' mtandaoni, lakini ndiyo msingi imara wa kulinda Amani
na Uhuru wa Taifa letu.
0 Maoni