WAAJIRIWA
wapya wa Tume ya Madini wametakiwa kufuata kikamilifu miongozo, kanuni na
taratibu za utumishi wa umma, sambamba na kudumisha maadili na uadilifu
wanapoanza kutekeleza majukumu yao.
Wito huo
umetolewa leo, Novemba 21, 2025, na Katibu Mtendaji wa Tume ya Madini, Mhandisi
Ramadhani Lwamo, wakati akifungua mafunzo ya awali kwa watumishi hao
yaliyofanyika katika Ukumbi wa Graphite, Makao Makuu ya Tume jijini Dodoma.
Akizungumza
katika mkutano huo, Mhandisi Lwamo amesisitiza umuhimu wa watumishi hao wapya
kujiepusha na vishawishi vinavyoweza kuhatarisha uadilifu wao katika sekta ya
madini.
“Sekta ya
madini ina vishawishi vingi. Mara nyingi wafanyabiashara wanatafuta njia za
kupata faida kubwa. Kwenye dhahabu kuna masuala ya ubora na usafi (quality na
purity). Msikubali kushawishiwa kwa vijisenti ambavyo vinaweza kuwatia hasara
baadaye,” amesema.
Ameongeza
kuwa Tume haitavumilia aina yoyote ya mwenendo usio wa uadilifu:
“Epukeni
tamaa za mafanikio ya haraka. Mmefundishwa maadili, myashike na myazingatie.
Itanisikitisha sana kuona mtumishi akipoteza ajira kwa sababu ya kukiuka
misingi ya uadilifu.”
Mbali na
suala la maadili, Mhandisi Lwamo amewahimiza waajiriwa hao kuanza kupanga
maisha yao ya baadaye, ikiwemo maandalizi ya kustaafu, akisema kutobweteka
kutawasaidia kujenga mustakabali bora wa kazi na maisha.
Awali,
Mkurugenzi wa Rasilimali Watu na Utawala, Nsajigwa Kabigi, amesema mafunzo hayo
yamelenga kuwajengea uelewa wa muundo na majukumu ya Tume ya Madini, haki na
wajibu wa mtumishi wa umma, taratibu za ukaguzi na uhifadhi mazingira migodini,
haki madini, pamoja na sheria na kanuni mbalimbali zinazosimamia sekta ya madini.
“Mafunzo
mliyopata yawafanye kuwa mabalozi wazuri wa Tume. Wengi wenu mtakwenda kwenye
ofisi za Maafisa Madini Wakazi wa Mikoa (RMOs). Nidhamu iwe nguzo na muende
mkaiwakilishe Tume kwa weledi,” amesema.
Kwa niaba ya
waajiriwa wenzake, Dorcas Michael ameushukuru uongozi wa Tume ya Madini kwa
kuwapokea na kuwapa ajira, huku akiahidi kwamba watatekeleza kwa vitendo yote
waliyofundishwa na kuzingatia maadili ya utumishi wa umma.
0 Maoni