Mjadala mkali kuhusu namna nchi za Kiafrika zinavyotangazwa duniani umeibuka kufuatia kauli za msanii na mfanyabiashara mashuhuri wa Kimarekani mwenye asili ya Afrika, Akon. Akizungumza kuhusu umuhimu wa 'Branding' (Kujitangaza) wa taifa, Akon amesisitiza kuwa vyombo vya habari na wasanii wana jukumu la msingi la kubadilisha simulizi hasi (negative narratives) zinazoelekezwa barani Afrika.
Kauli za Akon zinazosisitiza falsafa
ya kibiashara ya "Dunia ni namna unavyojitangaza" zimetumika kutoa
wito mpya kwa Watanzania na Waafrika kwa ujumla, hasa waandishi wa habari,
kuacha mtindo wa "Hatutaki Tena" wa kupeperusha habari zenye madhara.
Akon, ambaye amejijengea himaya yake
ya biashara na muziki kimataifa, anatoa muhtasari wa kibiashara unaoelezea kwa
nini Marekani inaonekana yenye nguvu na ushawishi zaidi duniani.
"Hii Dunia ni namna
unavyojitangaza. Ukijitangaza kwa ubaya utaonekana mbaya, ukijitangaza kwa
uzuri utaonekana mzuri," anasema Akon.
Alieleza kuwa Marekani inajulikana
kama nchi ya kwanza kujitangaza kwa uzuri, ambapo filamu zao zimetumia wahusika
kama Superman na Batman kusimulia hadithi za ushujaa na uwezo wa kipekee.
Kinyume chake, alidai kuwa filamu za Kiafrika kwa kiasi kikubwa zimeshindwa
kuonesha ushujaa wa viongozi na mashujaa wa bara hili, kama vile Shaka Zulu.
Akon alitumia mfano wa matukio ya
kiusalama kulinganisha namna Marekani na nchi za Afrika zinavyoshughulikiwa na
kutangazwa kimataifa.
"Kuna Marekani kulikuwa na
matukio zaidi ya 25,000 ya mauaji lakini Kenya kulikuwa na matukio mawili tu
yaliyohusishwa na ugaidi. Lakini Kenya ilionekana ni hatari mpaka watu
waliogopa kwenda," alieleza.
Alisisitiza kuwa jukumu hili
linabebwa na vyombo vya habari vya Afrika, ambavyo kwa mujibu wake,
"kukitokea tatizo vinakimbilia kutangaza mabaya na kutoa simulizi mbaya,
wakati wenzetu hawafanyi hivyo." Hii inajenga picha hasi, au 'negative
effect', ambayo inaathiri sekta za kiuchumi kama utalii na uwekezaji.
Wito kwa Waandishi wa Habari na
Wasanii
Kama Akon anavyosema, jukumu la
kutangaza nchi kwa uzuri linabebwa na:Vyombo vya
habari,Wasanii,Waandishi,Wachezaji filamu, na wengineo.
Wito unaotolewa kwa waandishi wa
habari wa Kitanzania na waendeshaji wa vyombo vya habari kukumbatia falsafa hii
ya 'Branding' chanya. Badala ya kuzipa kipaumbele habari chache hasi na
kuharibu taswira, wajikite katika kutangaza uzuri wa kipekee wa Tanzania:
utamaduni, vivutio vya utalii, fursa za uwekezaji, na maendeleo ya kiuchumi na
si waandishi wa habari wa vyombo vya kimataifa wanaoitangaza Afrika kwa kuweka
mbele picha mbaya wakiwa na lengo la kudhalilisha badala ya kujenga.
0 Maoni