Chama cha Maafisa Usafirishaji (Bodaboda)
mkoa wa Pwani kimetangaza rasmi kwamba hawatahusika na aina yoyote ya vurugu,
uchochezi, au maandamano yanayohamasishwa kupitia mitandao ya kijamii. Chama
hicho kimelaani vikali vitendo vya kihalifu na kuahidi kushirikiana na Jeshi la
Polisi kulinda amani.
Kauli hiyo ilitolewa mnamo
Novemba 17, 2025, na viongozi wa chama hicho walipozungumza na vyombo vya
habari katika Ofisi yao iliyopo Wilaya ya Kibaha.
Mwenyekiti wa Chama hicho Mkoa wa
Pwani, Bw. Masoud Ally, alieleza kuwa Chama chao kinalaani vikali vurugu
zilizojitokeza katika maeneo machache ya mkoa wa Pwani wakati wa Uchaguzi Mkuu,
akisema vitendo hivyo vilifanywa na "watu wachache wasio na nia njema na
nchi hii."
Bw. Masoud alitoa tamko la wazi
kuhusu wito unaoendelea wa maandamano ya Disemba 09, 2025:
"Maafisa usafirishaji
wanatoa tamko kuwa hawapo tayari kushiriki kwani madhara yake ni makubwa.
Kwanza, yatapelekea sisi kushindwa kufanya kazi kwa uhuru na amani, hivyo
kuzorotesha uchumi wetu wenyewe, uchumi wa wateja wetu, na uchumi wa taifa kwa
ujumla."
Akizungumza kwa niaba ya wenzake,
Bw. Hemed Kibanga alikumbushia mateso waliyopitia wakati wa vurugu zilizopita.
"Kwa siku zilizotokea vurugu
kila mmoja ameona tabu na mateso waliyopitia ikiwemo kukosa huduma za kijamii
na baadhi ya bidhaa kupanda bei," Bw. Hemed alisema. Aliongeza kuwa hali
hiyo iliathiri moja kwa moja familia zao, na kwa sababu hiyo hawapo tayari
kushawishiwa tena.
Bw. Kibanga alisisitiza azma yao
ya kutoa ushirikiano kamili: "Tutatoa ushirikiano kwa Jeshi la Polisi ili
kuwabaini wahusika na hatua za kisheria zichukuliwe dhidi yao."
Katika hatua ya kulinda sekta yao
na kuondoa wahalifu, Maafisa Usafirishaji hao wamekubaliana kuweka mfumo wa
utambulisho wa wazi. Waliazimia kuvaa viakisi mwanga ambavyo vitakuwa na namba
zao za usajili ili waweze kutambulika kwa urahisi. Hatua hii inalenga kuwabaini
haraka wale wanaofanya uhalifu kwa kivuli cha kuwa ni
maafisa usafirishaji.
0 Maoni