Makamu Mwenyekiti wa Bodi ya Wakurugenzi ya TAWA Dk. Simon
Mduma amesema mpango mkatati wa kibiashara wa kuendeleza shughuli za utalii
eneo la Makuyuni Wildlife Park uliondaliwa na Mamlaka ya Usimamizi wa
Wanyamapori Tanzania - TAWA unatarajiwa kuiingizia Serikali mapato makubwa
ikiwa ni pamoja na kunufaisha jamii zinazozunguka eneo hilo.
Dk. Mduma ameyasema hayo Novemba 26, 2023 wakati wa ziara ya
wajumbe wa bodi ya Wakurugenzi ya TAWA katika Hifadhi ya Makuyuni Wildlife Park
iliyopo wilaya ya Monduli, Mkoa wa Arusha ikiwa ni mara ya kwanza kwa wajumbe
wa bodi hiyo kufanya ziara katika hifadhi tangu ikabidhiwe kwa TAWA Oktoba 03,
2023.
Akizungumza kwa niaba ya Mwenyekiti wa Bodi ya TAWA Mej.
Jen. (Mstaafu) Hamis Semfuko, Dk. Mduma amesema tangu eneo la Makuyuni Wildlife
Park likabadhiwe kwa TAWA, menejimenti ya TAWA imechukua hatua mbalimbali
ikiwemo kuandaa mpango maalumu wa biashara na kuendeleza eneo hilo ili liweze
kutumika vizuri kwa biashara ya utalii na mpango huo uliwasilishwa kwenye bodi
na bodi ikaridhia utekelezaji wake.
Aidha, amesema pesa kwa ajili ya utekelezaji wa mpango huo
ipo na imekwisha tengwa kilichobaki ni kuanza utekelezaji.
Pia ametoa rai kwa wananchi wanaoishi pembezoni mwa eneo
hilo kuongeza ushirikiano kwa TAWA kwa kuwa mradi huo ni wa Taifa na umma kwa
ujumla na wao kama wananchi wa eneo husika ni wanufaika wakubwa wa mradi huo.
Kwa upande wake, Kamishna wa Uhifadhi wa TAWA Mabula
Misungwi Nyanda amesisitiza kuwa TAWA itahakikisha inawashirikisha wananchi
wote wa Makuyuni katika shughuli zote zitakazofanyika eneo hilo, lakini kwa
kuanzia TAWA itaanza zoezi la kuainisha mipaka ili ijulikane kwa wananchi wote
Kamishna Mabula amesema katika eneo hilo kutakuwa na kazi
nyingi zitakazofanyika ambazo zitawanufaisha wananchi hasa katika upande wa
ajira kama vile ujenzi wa miundombinu ya barabara, malazi ya watalii n.k.
Aidha, amewapongeza wanahabari wote nchini kwa kazi kubwa
wanayoifanya katika kutangaza utalii na shughuli mbalimbali zinazofanywa na
TAWA nchini.
Naye Kamanda wa Makuyuni Wildlife Park Andrew Kishe amesema
katika kipindi cha mwaka mmoja wa kukabidhiwa kulilinda eneo hilo hali ya
usalama wa Wanyamapori imeimarika sana na kupelekea ongezeko kubwa la Wanyama
hao.
Pia amewakaribisha wageni wote nchini na nje ya mipaka ya
Tanzania kutembelea eneo hilo kwa kuwa ni eneo la kipekee lililobahatika kuwa
na mnyama adimu anayeitwa choroa "Oryx".
Na Beatus Maganja- Makuyuni Wildlife Park
0 Maoni