Uzingatiaji wa sheria ndio msingi wa kulinda haki za binadamu na utulivu nchini

 

Tume ya Haki za Binadamu na Utawala Bora imewataka wananchi kote nchini kuendelea kuheshimu sheria za nchi kwani kufanya hivyo ndio msingi mkuu wa wao kuweza kufurahia haki zao kikamilifu katika jamii.

Akizungumza wakati wa Maonesho ya 50 ya Biashara ya Kimataifa ya Dar es Salaam, maarufu kama Sabasaba, Katibu Mtendaji wa tume hiyo, Patience Ntwina aliwakumbusha wananchi kwa msisitizo kuwa utekelezaji wa haki za binadamu daima unaenda sambamba na wajibu wa kila mmoja wa kudumisha amani, utulivu pamoja na utaratibu katika jamii na nchini kwa ujumla.

Alifafanua kuwa uzingatiaji wa sheria na kanuni zilizopo kwa upande wa wananchi wote unaifanya tume hiyo iweze kutekeleza kwa ufanisi mkubwa jukumu lake la kikatiba la kuhamasisha na kulinda haki za binadamu.

Ntwina alieleza kuwa iwapo Watanzania wote wataendelea kudumisha utamaduni wao wa muda mrefu wa kuheshimu sheria na kanuni za nchi, watakuwa wamechangia kwa kiwango kikubwa sana juhudi zinazochukuliwa na tume hiyo katika kuhamasisha na kulinda haki za binadamu nchini.

Aliongeza kuwa ukiukwaji wa sheria na kanuni huleta athari kwani husababisha vyombo vya dharura na sheria, likiwemo Jeshi la Polisi, kuchukua hatua stahiki kwa mujibu wa sheria zilizowekwa ili kurejesha utaratibu.

Kwa mujibu wa maelezo yake, ushiriki wa tume hiyo katika maonesho hayo ya biashara umeiwezesha kupeleka elimu ya uraia karibu zaidi na wananchi, hatua ambayo imesaidia kwa kiasi kikubwa kuwasaidia kuelewa kwa kina haki zao za kimsingi pamoja na wajibu wao kwa taifa.

Alisisitiza kuwa ni muhimu sana kila mtu afurahie haki zake lakini afanye hivyo bila kukiuka au kuingilia haki za watu wengine.

Katika kuweka uzito kwenye hoja hiyo, alitolea mfano wa baadhi ya sehemu za starehe zinazopiga muziki kwa sauti kubwa katika maeneo ya makazi, akisema hali hiyo huifanya upande mmoja kudai kuwa unatekeleza haki zake za kibiashara au burudani, huku kwa upande mwingine ukivunja haki za wananchi wengine za kuishi katika mazingira tulivu.

Akizungumzia hali ya utawala bora nchini, Ntwina alisema kuwa binafsi ameridhishwa kwa kiwango kikubwa na kiwango cha amani na utulivu kinachoendelea kuwepo nchini kote. Alibainisha kuwa utulivu huo wa sasa umeendelea kuwezesha shughuli mbalimbali za kijamii na kiuchumi kufanyika kwa ufanisi wa hali ya juu na hivyo kuchochea maendeleo ya taifa kwa ujumla.