Balozi wa Uganda Kuandaa Mkutano wa Viongozi wa Habari Kuharakisha Umoja wa Afrika Mashariki

 

Na. Mwandishi wetu (TBN) Dar es Salaam

Balozi wa Uganda nchini Tanzania, Balozi Kanali Mstaafu Fred Mwesigye, ametangaza kuandaa kikao maalumu kitakachowakutanisha viongozi wa Baraza la Habari Afrika Mashariki chini ya uenyekiti wa David Omwoyo, Mtendaji Mkuu wa Baraza la Habari Kenya kujadili mikakati ya kuendeleza utalii wa kiutamaduni, uchumi wa ubunifu na sekta ya michezo inayokua kwa kasi katika ukanda huu.

Hatua hiyo inafuatia kikao cha ngazi ya juu kilichofanyika jijini Dar es Salaam kilichowakutanisha Balozi Mwesigye, Katibu Mtendaji wa Baraza la Habari Tanzania, Ernest Sungura, pamoja na wawakilishi wa Umoja Conservation Trust (UCT) wakiongozwa na Bryan Toshi , ambacho kilijadili kwa kina nafasi ya vyombo vya habari katika kujenga Shirikisho la Afrika Mashariki na kuharakisha umoja wa kikanda.

Katika kikao hicho, washiriki walikubaliana kwamba tasnia ya habari katika Afrika Mashariki inapaswa kuondokana na mtazamo wa kuripoti matukio ya kitaifa kwa namna ya kujitenga, na badala yake kujenga simulizi la kikanda linaloangazia matarajio, urithi na fursa za pamoja kwa wananchi wote.

Balozi Mwesigye alibainisha kuwa mjadala huu umejengwa juu ya maono ya kudumu ya waasisi wa Afrika Mashariki, hususan Mwalimu Julius Kambarage Nyerere na Mzee Jomo Kenyatta, ambayo yana umuhimu mkubwa leo kuliko wakati mwingine wowote katika historia kwani katika dunia inayozidi kutawaliwa na miungano mikubwa ya kikanda, Afrika Mashariki lazima iimarishe umoja wake ili kuongeza uimara wa kiuchumi, ushawishi wa kimkakati na ustawi wa pamoja.

Kauli hiyo pia inaenda sambamba na Hotuba ya Hali ya Taifa ya mwaka 2026 ya Rais wa Uganda, Yoweri Kaguta Museveni Tibuhaburwa, ambapo alithibitisha tena dhamira thabiti ya Uganda ya kuendeleza Shirikisho la Kisiasa la Afrika Mashariki na ushirikiano mpana wa Bara la Afrika akisisitiza kuwa ushirikiano wa kiuchumi na kisiasa ndiyo jibu sahihi kwa swali la ustawi wa kiuchumi na usalama wa muda mrefu.

Naye Ernest Sungura, ambaye pia ni Makamu Mwenyekiti wa Baraza la Habari Afrika Mashariki na Katibu Mkuu wa Baraza la Habari Duniani, alieleza kuwa vyombo vya habari lazima viwe daraja linalowaunganisha wananchi badala ya kuwa mipaka inayowatenganisha, na kuongeza kuwa ushirikiano wa kikanda utafanikiwa pale wananchi watakapoanza kujiona kama Waafrika Mashariki kwa kawaida sawa na wanavyojiona kupitia mataifa yao kama Tanzania, Uganda, Kenya, Rwanda, Burundi, Sudan Kusini, Kongo au Somalia.

Kikao hicho kiliangazia changamoto ya muda mrefu inayolikabili eneo hili ikiwemo uwepo wa masoko yaliyogawanyika na mitazamo finyu ya kitaifa ambayo mara nyingi huzuia ukanda huu kufikia uwezo wake kamili, huku kikisisitiza kuwa Afrika Mashariki iliyounganishwa kikamilifu ingekuwa na nguvu kubwa zaidi ya majadiliano ya kiuchumi, soko pana, mvuto kwa wawekezaji na ushawishi mkubwa wa kisiasa duniani.

Moja ya maeneo makuu ya kimkakati yaliyojadiliwa ni maandalizi ya michuano ya kihistoria ya AFCON 2027 itakayoandaliwa kwa pamoja na mataifa ya Afrika Mashariki, ambapo Balozi Mwesigye alisisitiza kuwa mashindano hayo yanapaswa kutazamwa kama mradi wa mageuzi ya kikanda badala ya tukio la michezo pekee, kwani yanatoa jukwaa la kuonesha fursa za uwekezaji, vivutio vya utalii na uwezo wa kushirikiana kama ukanda mmoja.

Akichangia mada hiyo, Bryan Toshi wa Umoja Conservation Trust alieleza kuwa mafanikio ya kweli ya AFCON 2027 yatapimwa kwa yale yatakayotokea kabla, wakati na baada ya mashindano, huku akihimiza matumizi ya simulizi zenye uratibu ili kuzalisha ajira na kuimarisha mshikamano wa watu kwa watu.

Aidha, washiriki waligusia umuhimu wa Kiswahili kama nyenzo kuu ya kuunganisha tamaduni na diplomasia ya kikanda, ambapo walijadili uwezekano wa kushirikiana na Sekretarieti ya Jumuiya ya Afrika Mashariki ili kuanzisha rasmi Wiki ya Kiswahili ya Jumuiya ya Afrika Mashariki inayopendekezwa kufanyika kila mwaka kuanzia tarehe 1 hadi 7 Julai.

Naye Ernest Sungura alikumbusha kuwa ushirikiano wa kikanda unahusu watu kwanza, na ingawa masuala ya miungano ya forodha na korido za biashara ni muhimu, ushirikiano wa kweli hufanikiwa pale watu wanapowasiliana na kuelewana kupitia maono ya pamoja yanayojengwa na vyombo vya habari.

Ujumbe mkuu uliotoka katika kikao hicho cha Dar es Salaam ulibaki kuwa wazi kwamba Shirikisho la Afrika Mashariki halitajengwa na serikali pekee, bali litajengwa kupitia mawazo, utamaduni, lugha, michezo na simulizi zinazowaunganisha wananchi, huku vyombo vya habari vikiwa injini kuu muhimu ya kuifikisha Afrika Mashariki kwenye hatima yake ya kuwa na nguvu na ustawi wa pamoja.