Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi, ametangaza ongezeko la kima cha chini cha mshahara kutoka shilingi 300,000 hadi 500,000 kwa mwezi, litakaloanza Januari 2027 baada ya kuzingatia hali ya uchumi, gharama za maisha na kuongeza motisha kwa wafanyakazi.

Ametangaza hatua hiyo katika kilele cha Maadhimisho ya Siku ya Wafanyakazi Duniani, akisisitiza dhamira ya Serikali kuimarisha mazingira ya kazi, kuhakikisha stahiki za watumishi na kuhimiza bidii, nidhamu na uzalendo kazini, huku akiweka wazi kuwa Serikali itaendelea kushirikiana na vyama vya wafanyakazi kukabiliana na changamoto zilizopo.

Aidha, amepongeza ushirikiano wa utatu kati ya Wizara ya Kazi na Uwekezaji, ZATUC na ZANEMA kwa kutatua changamoto 24 kati ya 29, akibainisha mafanikio ya Awamu ya Nane tangu 2020 katika kuboresha maslahi ya wafanyakazi, na kutangaza ajira mpya 7,500 kwa mwaka wa fedha 2026–2027, huku akihitimisha kwa wito wa bidii, uzalendo na kutanguliza maslahi ya umma.