Makamu wa Rais wa Jamhuri ya Muungano wa Tanzania, Mheshimiwa Dkt. Emmanuel Nchimbi, anatarajiwa kuwa Mgeni Rasmi katika maadhimisho ya miaka mitano ya kifo cha aliyekuwa Rais wa Awamu ya Tano, Hayati Dkt. John Pombe Magufuli. Maadhimisho hayo muhimu kitaifa yatafanyika Machi 17, 2026, nyumbani kwa Hayati Magufuli wilayani Chato, mkoani Geita.
Akizungumza na waandishi wa habari mkoani humo, Mkuu wa Mkoa wa Geita, Mheshimiwa Martine Shigela, alibainisha kuwa Dkt. Nchimbi anatarajiwa kuwasili mkoani Geita leo mchana kupitia Uwanja wa Ndege wa Chato tayari kwa shughuli hiyo. Aidha, taarifa hiyo imeeleza kuwa tukio hilo litahudhuriwa pia na Rais wa Serikali ya Mapinduzi ya Zanzibar, Mheshimiwa Dkt. Hussein Mwinyi, ambaye anatarajiwa kuwasili mkoani humo hapo kesho.
Orodha ya viongozi wakuu wastaafu wanaotarajiwa kushiriki kuifariji familia na kumuenzi kiongozi huyo ni pamoja na Makamu wa Rais Mstaafu, Mheshimiwa Dkt. Philip Mpango, pamoja na aliyekuwa Waziri Mkuu, Mheshimiwa Kassim Majaliwa. Uwepo wa viongozi hawa unadhihirisha heshima ya kipekee ambayo serikali na taifa kwa ujumla linaendelea kuitoa kwa mchango wa Hayati Dkt. Magufuli katika maendeleo ya nchi.
Tukio hilo ambalo limeratibiwa kwa ushirikiano kati ya familia ya Hayati Dkt. Magufuli na Serikali, litatanguliwa na Misa Takatifu ya kumuombea na kumuenzi. Misa hiyo itafanyika nyumbani kwake Chato na kuongozwa na Askofu Severine Niwemugizi wa Jimbo Katoliki la Rulenge-Ngara. Kwa mujibu wa RC Shigela, maadhimisho hayo yataanza rasmi leo kwa matukio mbalimbali ya kijamii, yakiwemo mbio maalum zinazoelekea katika Hospitali ya Wilaya ya Chato.
"Matukio mengine yatakayosindikiza adhimisho hili ni pamoja na zoezi la uchangiaji damu, utoaji wa misaada kwa wafungwa katika Gereza la Chato, kuzuru kaburi la kiongozi wetu sambamba na mkesha wa usiku," alisema Mheshimiwa Shigela. Alitumia fursa hiyo kutoa wito kwa wananchi wote, bila kujali itikadi zao, kujitokeza kwa wingi kumuombea na kumuenzi kiongozi huyo aliyepambana kwa ajili ya wanyonge.
Hayati Dkt. John Pombe Magufuli alifariki dunia Machi 17, 2021, katika Hospitali ya Mzena jijini Dar es Salaam na kuzikwa Machi 26, 2021, Chato mkoani Geita. Maadhimisho haya ya miaka mitano ni kielelezo cha kuendelea kuishi kwa maono na misingi ya utendaji aliyoiacha katika taifa la Tanzania.
0 Maoni