Wakati Tanzania ikiendelea kufurahia utulivu wake wa kudumu, kauli za
busara zimeendelea kutolewa na wazee wa Taifa pamoja na wadau mbalimbali,
wakisisitiza umuhimu wa kudumisha amani na kutoa onyo kali kwa vijana dhidi ya
kutumiwa na makundi yenye nia ya kuvuruga nchi.
Wazee hao, wamechukua jukwaa la mijadala ya kijamii kueleza kwa hisia
jinsi maisha yanavyoweza kuyumba ghafla endapo amani itatoweka, huku
wakikumbusha historia ya uongozi wa nchi. Walieleza jinsi marais wote
waliopita, kuanzia Hayati Mwalimu Julius Kambarage Nyerere, walivyoiweka nchi
katika misingi ya amani thabiti.
"Wazee wetu wametuongoza vizuri kuanzia Kambarage, ametoka Kambarage
akaingia mzee Mwingi (Ali Hassan Mwinyi)... yaani marais wote waliopita hapa
walituongoza kwa amani," alisema mmoja wa wazee, Ally Bomba Omary
akionyesha masikitiko yake. Aliongeza, "Matatizo haya yametokea wapi hata
haieleweki? Watu hawa wametokea wapi? Yaani wanataka kupoteza amani yetu,
tuishi kwa kuhangaika hangaika."
Wazee hao walitumia mfano wa maisha ya kila siku kueleza athari mbaya za
vurugu, huku wakigusa moja kwa moja maisha ya Watanzania wa hali ya chini.
"Hizi siku chache tu, sisi tusiokuwa nacho ilikuwa tuna matatizo.
Kwa sababu sisi ununuzi wetu wa unga ni nusu kilo nusu kilo. Sasa usipopata
unga, unapata shida kwa sababu maduka yamefungwa," alifafanua mzee huyo.
"Unaweza ukawa na senti yako lakini duka limefungwa. Kwa hiyo sisi
tuliteseka sana. Tunataka kuwaambia vijana wetu waliopo mitaani tuliona hali
ilivyokuwa mbaya."
Kauli hii inatoa taswira halisi ya jinsi uvunjifu wa amani unavyovuruga
biashara ndogo ndogo, kuwanyima wananchi wa kipato cha chini uwezo wa kujipatia
mahitaji ya msingi.
Ujumbe mkuu kutoka kwa wazee kwa vijana wa leo ni kutumia akili timamu na
kukataa ushawishi wa makundi mabaya.
"Mna akili timamu, msifuate
vitu vya kuambiwa ambiwa na watu," alionya mzee Ally. "Haya makundi
ya kushawishiwa na watu bila kufikiri yatawapoteza na kuleta tatizo katika
amani yetu."
Maoni kutoka kwa wadau wengine yalisisitiza umuhimu wa kujiimarisha ndani
kwanza kabla ya kuitafuta amani nje. "Moyo unaotafuta amani hauna nafasi
ya chuki. Tafuta amani ndani kwanza," alisema Brainlight_Graphics.
Wadau wengi walisisitiza jukumu la vijana katika kulinda urithi huu wa
utulivu. Mmoja ambaye mtandaoni alijitambulisha kama Youth_ambasador alieleza:
"Amani ni nguzo ya maendeleo, tushikamane kwa upendo ili Tanzania ibaki
kuwa kisiwa cha utulivu na matumaini."
Kupitia kauli iliyosambazwa na Chief Mkwawaa, Watanzania walikumbushwa:
"Umoja ni Nguvu, Utengano ni Udhaifu!" Kauli hiyo iliendelea kwa
kuwataka wananchi kumkataa kila anayejaribu kuleta kauli za uchochezi au
kutumia udini, ukabila, au tofauti zozote kututenganisha. "Tudumishe:
Amani, Upendo, na Umoja wa kitaifa!" ilimaliza kauli hiyo.
Aidha, Ronaldo_Bernadinho aliongeza kuwa: "Amani tuliyonayo ni tunu
na alama ya taifa letu maana mataifa mengine yamekosa hii sifa na wanakuja
kwetu, kwahiyo nitoe ushauri... tudumishe amani yetu ambayo ndo msingi wa
maisha bora na sio tuanze kuishi kwa hofu."
0 Maoni