Mhe. Nanauka: Masuala ya vijana kupewa kipaumbele

 

Waziri wa Nchi, Ofisi ya Rais- Maendeleo ya Vijana, Mhe. Joel Nanauka, amesema Serikali ya Awamu ya Sita inayoongozwa na Mhe. Rais Dkt. Samia Suluhu Hassan imeweka mikakati madhubuti inayolenga kuhakikisha masuala ya Vijana nchini yanapewa kipaumbele katika nyanja za kiuchumi, kijamii na kisiasa.

Amesema miongoni mwa maeneo yatakayopewa kipaumbele ni pamoja na kushirikishwa kikamilifu katika mchakato wa maamuzi, kuwapatia mitaji ya kuwainua kiuchumi pamoja na kusaidiwa kupata fursa za kazi na ajira ndani na nje ya nchi.

Mhe. Nanauka amesema hayo leo Novemba 20, 2025 Mtumba jijini Dodoma, wakati wa hafla ya kukabidhiwa vitendea kazi kwa ajili ya kuanza rasmi majukumu yake.

Aidha, Waziri Nanauka amesisitiza kuwa Serikali itaendelea kuimarisha mifumo ya utoaji wa mafunzo ya stadi za maisha na ujuzi wa kazi kwa nguvu kazi ya Taifa ambayo kwa asilimia kubwa ni vijana ili kuwajengea uwezo wa kujiajiri na kumudu ushindani katika soko la Ajira.