Licha ya wingu la azimio la Bunge la Umoja wa Ulaya (EU) lililojadili masuala ya haki za binadamu na kupendekeza kuzuia kwa muda msaada wa Euro milioni 156, Serikali ya Tanzania imethibitisha kuwa inaendelea kuthamini urafiki na ubia wake wa miaka 50 na EU.
Serikali imepuuza wito wa baadhi ya
Watanzania kutaka maazimio kuwa masharti lazima ya kutekelezwa mara moja,
ikisisitiza kuwa Tanzania haifungwi na maamuzi ya Bunge la EU.
"Hakuna maagizo na maelekezo ya
aina yoyote tunayolazimika kutekeleza... Kila upande una mipaka ya jurisdiction
yake. Jambo lolote ni lazima lipate mwafaka kwenye majadiliano," ilisema
Serikali.
Ilikumbusha kuwa msingi wa uhusiano
wa kidiplomasia na EU uko chini ya Kamisheni ya Umoja wa Ulaya, ambayo ndiyo
chombo rasmi kinachosimamia mikataba na mashauriano. Kwa mantiki hiyo, Serikali
inatarajia uamuzi wa mwisho utatoka kwa Kamisheni, baada ya wao kufanya maamuzi
kuhusu azimio hilo la Bunge.
Kukubali Kutokukubaliana
Serikali imeeleza kuwa hata katika
masuala mazito kama kuondoa adhabu ya kifo, ambayo Bunge la EU limetoa wito,
wito huo umekuwa ukitolewa kwa miaka mingi kwenye majukwaa tofauti. Hata hivyo,
Serikali imebainisha kwamba urafiki huu unajengwa kwa misingi ya kutambua
common values na common interests, ambapo pia wakati mwingine inakubalika
"kutokukubaliana."
Kuhusu suala la misaada, Serikali
imesisitiza kuwa Kamisheni imesubirisha (put on hold) utiaji saini wa Programu
ya 2025 ili kutoa fursa ya mashauriano. Serikali inatumaini kushirikiana na EU
ili hatua za utiaji saini zikamilike kabla ya Februari 2026, wakati mikataba ya
fedha ilipopangwa kusainiwa, ili kunusuru miradi muhimu inayoitegemea fedha
hiyo.
0 Maoni