Kaimu
Kamishna wa Uhifadhi wa Mamlaka ya Usimamizi wa Wanyamapori Tanzania - TAWA,
Mlage Yussuf Kabange amefungua rasmi mafunzo ya Waendesha Mashtaka wa TAWA
wanaojihusisha na uendeshaji wa kesi za uhalifu wa wanyamapori.
Akizungumza
katika ufunguzi wa mafunzo hayo yaliyofanyika Novemba 18, 2025, katika ukumbi
wa Rau Casanova Hill uliopo katika Wilaya ya Manyoni, Mkoa wa Singida, Kamishna
Kabange alisema mafunzo haya yamejikita katika kuimarisha shughuli za
uendeshaji wa kesi mbalimbali zinazohusu uhalifu wa wanyamapori.
“Mafunzo
haya ni muhimu, kwani yanaongeza ujuzi na ufanisi katika kukabiliana na uhalifu
wa rasilimali yetu ya wanyamapori,” alisema Kamishna Kabange.
Sambamba na
hilo, Kamishna Kabange aliongeza kuwa mafunzo haya yanaunganisha Waendesha
Mashtaka wa TAWA pamoja na wataalamu wengine kutoka Ofisi ya Taifa ya Mashtaka
na Jeshi la Polisi ili kukumbushana taratibu, kujadiliana changamoto za
kiutendaji na kupitia mabadiliko muhimu ya sheria.
Kadhalika,
Kamishna Kabange aliwataka washiriki kutumia kikamilifu fursa hii kwa kujifunza
mbinu na mikakati itakayoboresha utendaji na kuongeza ushindi katika uendeshaji
wa kesi. Pia aliwasisitiza kufanya kazi kwa uzalendo, uadilifu na kuzingatia
sheria.
Vilevile,
Kamishna Kabange aliishukuru Ofisi ya Taifa ya Mashtaka kwa ushirikiano wake
mkubwa katika kuhakikisha kesi za uhifadhi zinamalizika kwa wakati na kwa
mafanikio.
Mafunzo haya
yamewakutanisha wataalamu mbalimbali kutoka TAWA, Ofisi ya Taifa ya Mashtaka,
Ofisi ya Mkemia Mkuu wa Serikali na Jeshi la Polisi.
0 Maoni