Chuo Kikuu cha RUDN Kumtunuku Rais Samia Shahada ya Heshima

 

Na. Beda Msimbe,TBN, Moscow

Rais wa Jamhuri ya Muungano wa Tanzania Dkt. Samia Suluhu Hassan ambaye yupo hapa Shirikisho la Urusi kwa ziara ya kitaifa anatarajiwa kutunukiwa Shahada ya Uzamivu na Chuo Kikuu cha RUDN nchini hapa.

Tuzo hiyo inatokana na kutambua kazi yake na mchango wake katika jamii ya Tanzania na dunia katika masuala ya msingi yanayohusu maisha ya binadamu.

Chuo cha RUDN chenye wanafunzi wa Kitanzania 570 kufikia mwaka 2025, katika miaka zaidi ya 65 ya RUDN, Watanzania 1,132 wamepitia chuo hicho.

RUDN kimesomesha zaidi ya wataalamu 200,000 duniani na sasa kina watu 44,000 kutoka nchi 160 duniani. Chuo hiki ni cha 367 kwa ubora duniani kwa mujibu wa QS World University Ranking ya mwaka 2025.

Rais Dkt. Samia ambaye amepokelewa jana na Waziri wa Maendeleo ya Uchumi wa Urusi Maxim Reshetnikov anatarajiwa kukutana na mwenyeji wake Rais Vladimir Putin na kufanya mazungumzo ya ana kwa ana kwa ajili ya kuimarisha uhusiano wa kidiplomasia na kiuchumi.

Aidha, akiwa nchini hapa, akiwa kiongozi wa pili wa Tanzania kutembelea Urusi, ziara ya kwanza ikiwa imefanywa na Baba wa Taifa Mwalimu Julius Nyerere, atashiriki Jukwaa la Uchumi la St. Petersburg ambapo Tanzania itanadi fursa za uwekezaji na diplomasia ya uchumi kwa viongozi, wawekezaji na watunga sera wa kimataifa.

Katika kufanikisha Dira ya Taifa ya Maendeleo 2050, ziara hii ni kichocheo cha utekelezaji kwa mafanikio ya dira hiyo ambayo inahitaji rasilimali watu wenye utaalamu na upeo mkubwa kusimamia na kuendesha miradi ya kimkakati itakayopelekea ajira, viwanda na biashara zitakazoingiza dola trilioni moja na kuwa katika uchumi wa kati wa juu.

Katika WhatsApp yake, Rais Samia amesema ziara hiyo ni muhimu hasa taifa linapoelekea kuanza utekelezaji wa Dira ya Taifa ya Maendeleo 2050 ambayo inataka ushiriki mkubwa wa sekta binafsi.

"Tutafanya mazungumzo na wenyeji wetu yanayolenga kuimarisha ushirikiano katika sekta za kimkakati zinazogusa maisha ya wananchi."

"Aidha, tutashiriki majukwaa ya biashara na uwekezaji na kutangaza fursa zilizopo nchini, pamoja na kufungua zaidi fursa za masoko kwa bidhaa za Tanzania nchini Urusi."